იმდენმა განაცხადა მაჟორიტარობაზე პრეტენზია, რომ შეიძლება არ ჰყოფნით ახლა 30 ადგილი და სჭირდებათ მეტი მაჟორიტარი იყოს, ეს ნახევრად ხუმრობით, მაგრამ რეალურად, თუ ერთ კრიმინალზე ჩამოკიდებენ ამ პროცესს, ეს მათი საქმეა,- ამის შესახებ საპარლამენტო უმრავლესობის ლიდერმა მამუკა მდინარაძემ საკონსტიტუციო ცვლილებებთან დაკავშირებით განაცხადა, რითაც ოპოზიციის განცხადებებს გამოეხმაურა.

დეპუტატის განმარტებით, „ქართული ოცნება“ შეთანხმებას პირნათლად შეასრულებს, თუმცა, თუ საკონსტიტუციო ცვლილებები მაინც ჩავარდება,ძველი სისტემით არჩევნებში კიდევ უფრო მყარ გამარჯვებას მოიპოვებს.

„რეალურად, „ქართული ოცნება“ შეთანხმებას შეასრულებს პირნათლად. გუნდი მთლიანად დაუჭერს მხარს 120/30-ზე სისტემას, მაგრამ თუ ისინი გადაწყვეტენ, სხვასაც აიყოლიებენ ოპოზიციიდან და ისევ დარჩება 77/73-ზე , ამ შემთხვევაშიც ძალიან მყარად, დიდი უპირატესობით მოვიგებთ, მაგრამ მე მგონი ამათ არ ჰყოფნით უკვე ადგილები, იმიტომ რომ იმდენმა განაცხადა მაჟრიტარობეზე პრეტენზია, რომ შეიძლება არ ჰყოფნით ახლა 30 ადგილი და სჭირდებათ მეტი მაჟორიტარი იყოს, ეს ნახევრად ხუმრობით, მაგრამ რეალურად, თუ ერთ ადამიანზე, ერთ კრიმინალზე ჩამოკიდებენ ამ პროცესს და იტყვიან რომ თუ კონკრეტული ადამიანი არ გათავისუფლდა, თუ ხელისუფლება არ ჩაერია მართლმსაჯულებაში და მისი გარეთ გამოშვება არ უზრუნველყო, მაშინ ჩვენ არ მივცემთ ხმას, ეს მათი საქმეა. ნებისმიერ შემთხვევაში, 120/30-ზე იქნება, ძველი სისტემით იქნება, რომელიც სხვათაშორის თავის დროზე თავად ჩააგდეს და მაშინ საზოგადოება მოატყუეს და თუ იგივეს გააკეთებენ დღესაც, მაშინ არც ის არის პრობლემა, რომ გავიდეთ იგივე სისტემით და იგივე სისტემით კიდევ უფრო მაგრად დავამარცხოთ და კიდევ უფრო მყარი გამარჯვება მოვიპოვოთ არჩევნებში,“-განაცხადა მდინარაძემ.

შეგახსენებთ, გუშინ ოპოზიურმა პარტიებმა შეხვედრის შემდეგ განცხადება გაავრცელეს, სადაც აღნიშნულია, რომ პრეზიდენტის მიერ გამოცხადებული გადაწყვეტილება, რომლითაც გიგი უგულავა და ირაკლი ოქრუაშვილი გათავისუფლდნენ, მნიშვნელოვანი ნაბიჯია 8 მარტის შეთანხმების შესრულებისკენ. განცხადებაში პარტიები იმედს გამოვთქვამენ, რომ საპატიმროს მალე დატოვებს გიორგი რურუაც, ხოლო ამის შემდეგ საქართველოს პარლამენტი მიიღებს შეთანხმებულ საკონსტიტუციო ცვლილებებსა და ასევე გადაიდგმება ნაბიჯები საარჩევნო კანონმდებლობის საერთაშორისო რეკომენდაციების საფუძველზე გარდასაქმნელად.

ipn.ge