ღია სივრცის რესტორნები პირველი ივნისიდან ამუშავდნენ, 8 ივნისიდან კი რესტორნები და კაფე-ბარები ყველა სახის მომსახურებას აღადგენენ. შეზღუდვების მოხსნის მიუხედავად ძალაში რჩება გარკვეული რეგულაციები, რომლის შესრულება როგორც მომხმარებლებს ასევე ბიზნესსაც მოუწევს.
„კომერსანტი“ დაინტერესდა როგორ აისახება კორონავირუსის პანდემია სწრაფი კვების ობიექტებზე, დაწესებული რეგულაციებით შემცირებული დინამიკის გამო ხომ არ შეიცვლება სწრაფი კვების კონცეფცია. საკითხზე „მაკდონალდს საქართველოს“ მარკეტინგის მენეჯერი ალექსანდრე შენგელია საუბრობს. როგორც ირკვევა, სწრაფი კვების ინდუსტრიის ერთ-ერთმა ყველაზე დიდი წარმომადგენელი ბაზარზე საქმიანობის ახალი გეგმა შეიუმუშვა. ყველაზე მნიშვნელოვანი ცვლილება, რომელიც „მაკდონალდსში“ მომხმარებელს დახვდება, შემცირებული მენიუ და ნაკლები თანამშრომელია. მომხმარებლებს და პერსონალს აღარ ექნებათ ერთმანეთთან უშუალო კონტაქტი. „მაკდონალდს საქართველოს“ მარკეტინგის მენეჯერი დეტალურად აღწერს ყველა იმ ღონისძიებას, რომელიც სწრაფი კვების ობიექტმა გაატარა.
„ამ პერიოდის მანძილზე „მაკდონალდსის“ გუნდი დაუღალავად მუშაობდა კრიზისის საპასუხო ნაბიჯების შემუშავებასა და განხორციელებაზე. უმოკლეს დროში დავნერგეთ და გავამკაცრეთ ჯანმრთელობისთვის საჭირო უსაფრთხოებისა და სანიტარული ზომები. მაქსიმალურად შევამცირეთ მომსახურებისას ფიზიკური კონტაქტი- მუდმივად შეგვაქვს ცვლილებები ოპერირებაში, რათა უზრუნველვყოთ საყოველთაო უსაფრთხოება.
ყველა თანამშრომელი აღჭურვილია პირბადითა და ხელთათმანებით, რომლებიც იცვლება ყოველ 2 საათში ერთხელ; ყველა ინვენტარს სისტემატიურად უტარდება დეზინფექცია სპეციალური ხსნარებით; რესტორნებს კვირაში ერთხელ სრული დეზინფექცია უტარდება; თანამშრომლები ხელებს იბანენ რეგულარულად ანტიბაქტერიული საპნით.
ყოველდღიურად სამუშაოს დაწყებამდე თანამშრომლებს უზომავენ სიცხეს; დრაივზე მოქმედებს უკონტაქტო გადახდის სისტემა; სამზარეულოში თითო ცვლაში მუშაობს ნაკლები თანამშრომელი, რათა შესაძლებელი იყოს რეკომენდირებული დისტანციის დაცვა; ამავე მიზეზით შემცირებულია „მაკდონალდსის“ არსებული მენიუც;
გაწერილია სამოქმედო გეგმა კრიზისთან ბრძოლის მომდევნო ეტაპებისთვისაც. ჩვენი გუნდი უკვე აქტიურად მუშაობს, რათა მომზადებული შეხვდეს რესტორნების გახსნის პერიოდს. დაგეგმილია როგორც ინფრასტრუქტურული ცვლილებები, ისე - ცვლილებები ოპერირებაში: გაუქმებულია დარბაზში დასაჯდომი ადგილების ნაწილი, რათა მაგიდებს შორის დაცული იყოს დისტანცია; მომხმარებელთათვის ფუნქციონირებს ხელის სადეზინფექციო წერტილები; სალაროსთან დამონტაჟებულია გამყოფი ბარიერები და მომხმარებლებსა და პერსონალს არ ექნებათ ერთმანეთთან უშუალო კონტაქტი; რომ არ მოუწიოთ რიგში დგომა, ჩვენი სტუმრები ისარგებლებენ Table service-ით და შეკვეთას მიიღებენ მაგიდასთან; რესტორანი შესაბამისი საინფორმაციო სტიკერებით გასცემს რეკომენდაციებს უსაფრთხოების ნორმებთან დაკავშირებით და აკონტროლებს დისტანციის დაცვას; ასევე გაკონტროლდება რესტორანში შემოსულთა რაოდენობაც. პირბადის გარეშე შემოსვლა აკრძალულია. სავალდებულოა დეზობარიერის გავლაც. შემოსვლისას კი ყველა სტუმარი გაივლის თერმოსკრინინგს. ყველაფერი ისევ და ისევ ერთი მიზნით - უზრუნველვყოთ მომხმარებლებისა და თანამშრომლების მაქსიმალური უსაფრთხოება“, - განმარტავს ალექსანდრე შენგელია.
ალექსანდრე შენგელია აცხადებს, რომ კორონავირუსის გავრცელებასთან ერთად „მაკდონალდს საქართველო“, როგორც კვების ინდუსტრიის ყველაზე დიდი წარმომადგენელი ბაზარზე სერიოზული გამოწვევის წინაშე დადგა. მისი თქმით, რეკომენდაციების გათვალისწინებით, „მაკდონალდს საქართველოს“ რესტორნებმა სტუმრების დარბაზში მიღება 19 მარტს შეწყვიტა და მას შემდეგ მხოლოდ დრაივისა და მიწოდების სერვისს სთავაზობდა მომხმარებლებს. 1-ელ ივნისს გაიხსნა რესტორნის დარბაზები, 8 ივნისს კი იგეგმება დარბაზების გახსნაც. „მაკდონალდს საქართველოს“ მარკეტინგის მენეჯერი აცხადებს, რომ „მაკდონალდსი“ ითვალისწინებს, რომ ვირუსს გავლენა აქვს არამარტო ჯანმრთელობის, არამედ საზოგადოების ეკონომიკურ მდგომარეობაზეც. ამიტომ მისი თქმით კომპანია ცდილობს, მომხმარებლებს მუდმივად შევთავაზოთ ხელმისაწვდომი ფასები.
ბაჩო ადამია