მაისში წლიური ინფლაციის დონემ ბოლო 2.5 წლის ახალი რეკორდი მოხსნა და 7.7%-ს მიაღწია. ფასები გაზრდილია როგორც სურსათზე და უალკოჰოლო სასმელებზე, ასევევე ტრანსპორტზე, ენერგომატარებლებსა და ჯანდაცვაზე.

საქსტატის ცნობით ტრანსპორტის ჯგუფში ფასები 17.4%-ით გაიზარდა, რაც 2.08 პროცენტული პუნქტით აისახა მთლიანი ინდექსის ზრდაზე. ფასები გაიზარდა პირადი სატრანსპორტო საშუალებების ექსპლუატაციაზე 26.7% და სატრანსპორტო მომსახურებაზე 1.6%. ამასთან, ფასები შემცირდა სატრანსპორტო საშუალებების შეძენაზე -3.2%.

საცხოვრებელი, წყალი, ელ.ენერგია, აირი: ჯგუფში დაფიქსირდა ფასების 6.6%-იანი მატება, რაც 1.09 პროცენტული პუნქტით აისახა წლიურ ინფლაციაზე. ფასები გაიზარდა ქვეჯგუფებზე: ელექტროენერგია, აირი და სათბობის სხვა სახეები - 8.4% წყალმომარაგება და საცხოვრებელთან დაკავშირებული სხვა მომსახურება - 4.5%, საცხოვრებლის მიმდინარე მოვლა და შეკეთება - 3.2%. ამავე პერიოდში საცხოვრებლის ფაქტიურ გადასახადზე ფასები 9.4%-ით შემცირდა.

სურსათი და უალკოჰოლო სასმელები: ჯგუფში ფასები გაიზარდა 3.3%-ით, რაც წლიურ ინფლაციაზე 1.07 პროცენტული პუნქტით აისახა. ფასები მომატებულია შემდეგ ქვეჯგუფებზე: ზეთი და ცხიმი - 42.7%, შაქარი, ჯემი და სხვა ტკბილეული 13.7%,  რძე, ყველი და კვერცხი - 8%, ყავა, ჩაი და კაკაო - 8%, თევზეული - 7.6%, მინერალური და წყაროს წყალი, უალკოჰოლო სასმელები და ნატურალური წვენები - 7.2%,  ხორცი და ხორცის პროდუქტები  - 6%,  პური და პურპროდუქტები - 5.8%. ამასთან, საქსტატის მტკიცებით ხილი 20.9%-ით გაიაფდა, ბაღჩეული 23%-ით.

ჯანმრთელობის დაცვა: ჯგუფში ფასები მომატებულია 13.4%-ით, რაც 1.01 პროცენტული პუნქტით აისახა წლიურ ინდექსზე. ფასები გაიზარდა სამედიცინო პროდუქციის, აპარატურისა და მოწყობილობის - 19.5%, ამბულატორიული სამედიცინო მომსახურების - 11.9% და საავადმყოფოების მომსახურების  - 4.4%  ქვეჯგუფებზე.

აღსანიშნავია, რომ იმ პრდუქტების გაძვირებას, რასაც მთავრობა ბიუჯეტიდან ასუბსიდირებს, მაგალითად ელექტროენერგია და ფქვილი საქსტატი ინფლაციაში არ ასახავს, რაც ეკონომისტთა დიდი ნაწილის შეფასებით ინფლაციის განაკვეთის ხელოვნურ შემცირებასა და შემდგომში ეკონომიკური ზრდის ასევე ხოლოვნურად ზრდის წარმოჩენას ემსახურება.

ოფიციალური სტატისტიკითაც კი, ინფლაციის მიმდინარე განაკვეტი ეროვნული ბანკის მიერ განსაზღვრულ სამიზნე მაჩვენებელს 2.56-ჯერ აღემატება.