15 ნოემბრიდან ოკუპირებულ აფხაზეთში მოსახლეობისთვის ელექტროენერგიის მიწოდება მკვეთრად შეიზღუდა. დენის მიწოდების გრაფიკი ამოქმედდა, რომლის მიხედვითაც მთელი არაღიარებული რესპუბლიკის ტერიტორიაზე ენერგომომარაგება დღე-ღამეში 6 საათით წყდება.
ეს - უკეთეს შემთხვევაში, ზოგჯერ მოსახლეობას უშუქოდ დარჩენა უფრო დიდხანს უწევს, თანაც, როგორც წესი მიწოდება წყდება ყველაზე აქტიურ პერიოდებში - ძირითადად საღამოს, როდესაც ელექტროენერგია ყველაზე მეტადაა საჭირო.
ოპოზიცია დარწმუნებულია, რომ დე ფაქტო აფხაზეთს ენერგოსისტემის კოლაფსის მიზეზია მთელს ოკუპირებულ რესპუბლიკაში აქტიურად მოქმედი კრიპტოვალუტების ფერმები, რომლებსაც ფლობენ არ აღაირებულ ხელისუფლებასთან დაახლოებული ადამიანები.
ოფიციალურად გრაფიკი აუცილებელი იმის გამო გახდა, რომ ენერგომოხმარება სწრაფად იზრდება და მიწოდებას მკვეთრად აღემატება. გარდა ამისა, პრობლემა არა მხოლოდ მოთხოვნა-მიწოდების ბალანსის დარღვევაა, არამედ ენერგოსისტემის უკიდურესი გადატვირთულობა, რომელიც ხშირ ავარიებს იწვევს.
მაშინაც კი, როდესაც სახლებში დენი არის, მისი ძაბვა ძალიან დაბალი და არასტაბილურია, ქსელში ხშირია ვარდნები, რის გამოც სახლებში საყოფაცხოვრო ტექნიკა სულ უფრო ხშირად ზიანდება. ცხადია, ამ ზარალზე პასუხს არავინ აგებს.
პერიოდული ენერგოკრიზისები ოკუპირებულ აფხაზეთში ადრეც იყო, თუმცა ეს ძირითადად ენგურჰესზე წყლის დონის ვარდნასთან იყო დაკავშირებული. თანაც, როგორც წესი, ეს მხოლოდ იანვარ-თებერვალში ხდებოდა, თბილი სეზონის მოსვლასთან ერთად ენერგომომარაგებაც ჩვეულ კალაპოტს უბრუნდებოდა.
ამჟამად ყველაფერი ძალიან ადრე, აცივებამდე დაიწყო, რაც დაკავშირებულია კრიპტოვალუტების მოპოვებასთან - დე ფაქტო აფხაზეთი ძალიან მიმზიდველია მაინერებისთვის ელექტროენერგიის უკიდურესად დაბალი ფასის გამო, თანაც მაშინ, როდესაც არც ამ მინიმალურ საფასურსაც კი თითქმის არავინ იხდის.
გასათვალისწინებელია ისიც, რომ 2019 წელს ოკუპირებული აფხაზეთის არაღიარებულმა მთავრობამ კრიპტოვალუტების მაინინგი აკრძალა, თუმცა, ამ გადაწყვეტილებას რეალურად არ უმუშავია, საბოლოოდ კი, მოპოვება ისევ ლეგალური გახდა. დე ფაქტო მთავრობამ ეს მაინინგის მოწესრიგების და ბიუჯეტის შევსების სურვილით ახსნა.
მაგრამ ოპოზიცია ირწმუნება, რომ ლეგალიზება კრიპტოფერმების მხოლოდ 20%-მა გაიარა, უმეტესობა კი კვლავ ჩრდილში რჩება.
ბევრი ფერმა სახელმწიფო ობიექტებში მდებარეობს, და მათ უკან აფხაზი მაღალჩინოსნები დგანან, რომლებიც ენერგოსისტემის უმოწყალო ძარცვით საკუთარ კაპიტალს ზრდიან.
არაღიარებული აფხაზეთის მთავრობამ ელექტროენერგიის მიწოდების თხოვნით რუსეთს მიმართა, მაგრამ რუსული იმპორტი საკმაოდ ძვირია და მისი ღირებულების ანაზღაურება აუცილებელია.
შესაბამისად, ოკუპირებული აფხაზეთის მოსახლეობა მაინერებს თავისი ჯიბიდან აფინანსებს, არაღიარებული რესპუბლიკა კი რუსეთისგან ძვირადღირებულ სულ უფრო მეტ ენერგიას ყიდულობს.
ოკუპირებული აფხაზეთის სახელმწიფო ენერგოკომპანიის „ჩერნომორენერგო“-ს პრეს-მდივანმა ალხას გაგულიამ განაცხადა, რომ 2020 წლის მანძილზე რესპუბლიკაში ენერგომოხმარება 20%-ით გაიზარდა.
„შესაბამისად, გადამცემ ხაზებზე დატვირთვა 47%-ით გაიზარდა, ამიტომაც ინფრასტრუქტურა ვერ უძლებს, და გვიწევს ცალკეული ქვესადგურების შეზღუდვა მათი განტვირთვის მიზნით. ცხადია, რომ ენერგომოხმარების ასეთი მკვეთრი ზრდა კრიპტოვალუტების მაინინგმა გამოიწვია. ეს უკვე საიდუმლო არაა“ - განაცხადა მან,
მისი თქმით, ელექტროსისტემასთან უკანონო მიერთების აღკვეთისთვის სპეციალური კომისია შეიქნა, რომელმაც 150 კრიპტოფერმა გამოავლინა.
„დიდი სამუშაო ჩატარდა, თუმცა, შედეგების გამომდინარე, ეს საკმარისი არაა. პრობლემა ძალიან სერიოზულია - იმის მიუხედავად რომ ამდენი ფერმა გავთიშეთ, ყველანი ვხედავთ, რომ ენერგომომარაგებას ამან ვერ უშველა. შეგიძლიათ წარმოიდგინოთ მაინინგმა რა მასშტაბები მიიღო“ - ამბობს ალხას გაგულია,
მისი თქმით, რუსეთიდან ენერგიის მიღება პრობლემას არ წყვეტს.
„ამან შესაძლოა ენერგიის დეფიციტი დაფაროს, თუმცა, დღევანდელი მოხმარების შენარჩუნების პირობებში, ჩვენი ინფრასტრუქტურა ვერ გაუძლებს. თუ მოხმარება არ შემცირდა, ენერგიის იმპორტი ვერ გვიშველის“ - განაცხადა „ჩერნონომენერგოს“ წარმომადგენელმა.
წყარო: ekhokavkaza.com