აშშ-ის სახელმწიფო მდივანმა, მაიკ პომპეომ ჩინური კომპანია Huawei-ის წინააღმდეგ დაწესებული ახალი სანქციების შესახებ გამოაცხადა. ახალი სანქციების თანახმად, ამერიკული ტექნოლოგიით დამზადებული Huawei-ის პროდუქციის გაყიდვის მსურველმა კომპანიებმა აშშ-ისგან ლიცენზია უნდა მიიღონ.
„აშშ-ის მთავრობამ დღეს ქვეყნის ეროვნული უსაფრთხოებისა და 5G-ის ქსელის დასაცავად კიდევ ერთი ნაბიჯი გადადგა და გააფართოვა აშშ-ის ვაჭრობის სამინისტროს წესები უცხოურ პროდუქციასთან დაკავშირებით, რათა Huawei-იმ ამერიკული კანონებისთვის გვერდის ავლა ვერ შეძლოს. არ დავუშვებთ, რომ ჩინეთის კომუნისტური პარტიის მცდელობებმა, დაარღვიონ ჩვენი მოქალაქეების პირადი ცხოვრების ხელშეუხებლობა, შედეგი გამოიღოს. Huawei ჩინეთის კომუნისტური პარტიის ინსტრუმენტს წარმოადგენს და ვალდებულია, პარტიული დავალებები შეასრულოს. აშშ-ის იუსტიციის სამინისტრო კომპანიას ამერიკული ტექნოლოგიების მოპარვაში ადანაშაულებს“, - განაცხადა პომპეომ.
გასულ წელს აშშ-ის პრეზიდენტმა, დონალდ ტრამპმა 15 მაისს ხელი მოაწერა ბრძანებას, რომლის მიხედვითაც, ამერიკულ კომპანიებს იმ უცხოური სატელეკომუნიკაციო კომპანიებით სარგებლობა აეკრძალათ, რომლებიც ქვეყნის უსაფრთხოებას რისკის ქვეშ აყენებენ.
Imedinews