,,ვცდილობთ დავიცვათ ბალანსი ჩვენი ეკონომიკის საჭიროებებსა და ჯანმრთელობას შორის. რა თქმა უნდა, პრიორიტეტია ჩვენი მოქალაქეების ჯანმრთელობა“-ასე უპასუხა ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა ონლაინ ვაჭრობის შესახებ დასმულ კითხვას. ინფორმაციას რეგიონული განვითარებისა და ინფრასტრუქტურის სამინისტრო ავრცელებს.
მან აღნიშნა, რომ ყველა ის ბიზნეს - სუბიექტი რომელთაც უნდათ დღეს მუშაობა, სამწუხაროდ ექვემდებარებიან გარკვეულ შეზღუდვებს, მათ უწევთ ლოდინი რათა შემოწმდეს რამდენად აკმაყოფილებენ ამა თუ იმ პირობას, ეს ეხება როგორც ონლაინ ვაჭრობას, ასევე ძალიან ბევრ ინფრასტრუქტურის მშენებელ კომპანიას, რომლებიც ელოდებიან მათთან მისულ ინსპექციას.
,,ძალიან ბევრი კომპანია, აცხადებს რომ არის მზად მუშაობისთვის, შემოწმების შედეგად კი საპირისპირო ირკვევა. ბალანსი და ადაპტაცია ძალიან მნიშვნელოვანია ამ პროცესში. ადაპტაცია იმ ახალი რეალობის გათვალისწინებით, რომელშიც ვიქნებით როგორც ჩანს მანამდე სანამ ვაქცინა არ იქნება გამოყენებული და ეფექტურად გავრცელებული. ონლაინ ვაჭრობას რაც შეეხება პირადად მეც არაერთხელ მითქვამს და პრემიერმაც აღნიშნა დღეს, რომ თითქოს ყველაფერი მარტივად ჩანს, მომხმარებელი მხოლოდ ონლაინ ათავსებს შეკვეთას, მაგრამ შეკვეთის მოსატანად უნდა მოვიდეს კურიერი, იმისთვის რომ კურიერს გადასცენ ეს შეკვეთა მის ოფისში, საწყობში, კომპანიაში უნდა მუშაობდნენ ადამიანები. ჩვენთვის დღეს არის უკიდურესად მნიშვნელოვანი შევამციროთ კონტაქტები, მოძრაობა. ყველას გვინდა რომ ჩვენი ეკონომიკა მუშაობდეს, აქტიურად იყვნენ დასაქმებული ადამიანები და ამისთვის არის საჭირო წესების შესრულება და მისი მონიტორინგი. კიდევ ერთხელ მივმართავ ჩვენს მოქალაქეებს, რომ ეს შეზღუდვები არის დაწესებული მათივე ჯანმრთელობისთვის, მაქსიმალურად ვეცადოთ ყველა რომ ვიმუშაოთ სახლიდან, დავრჩეთ სახლში და შევზღუდოთ ჩვენი გადაადგილება, მოვითმინოთ იმისთვის რომ სწრაფად დავუბრუნდეთ ჩვეულ ცხოვრებას“-განაცხადა მაია ცქიტიშვილმა.