ცხადია, რომ არც ერთი ხელისუფლებისთვის არ არის მარტივი არაპოპულარული ღონისძიებების მიღება და როდესაც ჩვენ ვსაუბრობთ ყველაზე მსუბუქ შეზღუდვებზეც კი, ეს არის დისკომფორტი. რა თქმა უნდა, პირველ რიგში, ჩვენი ინტერესია, მხოლოდ ისეთ გადაწყვეტილებები მივიღოთ, რომელიც ჩვენს მოსახლეობას ან ბიზნესს ესიამოვნება, მაგრამ სამწუხაროდ, უკვე ერთი წელია ვცხოვრობთ პანდემიის პირობებში და თითოეული გადაწყვეტილება, ეპიდემიის დაწყების პირველივე დღიდან, ეფუძნება ბალანსის პოვნას ეკონომიკასა და თანამოქალაქეების ჯანმრთელობას შორის, - ამის შესახებ საქართველოს პირველმა ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა განაცხადა. ინფორმაციას ინფრასტრუქტურის სამინისტრო ავრცლებს.
მაია ცქიტიშვილის თქმითვე, თვეების წინ, როცა დღეში ინფიცირების ხუთი ათასამდე შემთხვევა ფიქსირდებოდა, სხვადასხვა სახის ბიზნესის გაყიდვები 40%-ით ნაკლები იყო, რადგან ადამიანებს ეშინოდათ რესტორანში მისვლა თუ სავაჭრო ობიექტებში საქონლის შეძენა.
„კარგად გვესმის, რომ თითოეული შეზღუდვა ავტომატურად ნიშნავს ეკონომიკურ განვითარებაზე უარყოფით ზეგავლენას, რაც პირდაპირ აისახება მოქალაქეების კეთილდღეობაზე. საბედნიეროდ, ამ ორი თვის განმავლობაში, წარმატებით შევძელით ინფექციის გავრცელების მართვა, რამაც მოგვცა თამამი ნაბიჯების გადადგმის საშუალება. ჩვენ უფრო გვინდა შეზღუდვების მოხსნა, ვიდრე ეს შეიძლება უნდოდეს ოპოზიციურ პოლიტიკურ პარტიებს, მაგრამ ძალიან კარგად გვესმის რამხელა პასუხისმგებლობას ვატარებთ, როგორც ეკონომიკურ განვითარებაზე, ისე თანამოქალაქეების ჯანმრთელობაზე. ასეთ დესტრუქციულ ძალებს არ შეიძლება არ ესმოდეთ თუ რამდენად სახიფათოა დაუმორჩილებლობისადმი მოწოდებები და იმ განცდის შექმნა, რომ პანდემია თითქოს აღარ არსებობს, რომ მსოფლიომ პანდემია უკვე დაამარცხა და ამიტომ, არ გვჭირდება არანაირი შეზღუდვა, მაშინ როდესაც ჯერ კიდევ 500-ზე მეტი შემთხვევა გვაქვს დღეში. შეგახსენებთ, რომ ზაფხულის ბოლოს 30-40 შემთხვევა გვქონდა და ძალიან სწრაფად მოხდა შემდგომ ვირუსის გავრცელება,“ - აღნიშნა მაია ცქიტიშვილმა.
ვიცე-პრემიერმა ყურადღება გაამახვილა ევროპის ქვეყნების გამოცდილებაზე, სადაც ბევრად მძლავრი ჯანდაცვის სისტემებია და მიუხედავად ამისა, თითქმის სრულადაა აკრძალული ნებისმიერი სახის ეკონომიკური საქმიანობა და მოქალაქეების სახლიდან გასვლაც კი.