ღრმაწყლოვანი პორტი საქართველოს აუცილებლად სჭირდება, ამიტომ მთავრობა ანაკლიის ნავსადგურის ასაშენებლად ახალი ინვესტორის მოძიების პროცედურებს დაიწყებს, - ამის შესახებ დღეს საქართველოს ვიცე-პრემიერმა, რეგიონული განვითარების და ინფრასტრუქტურის მინისტრმა მაია ცქიტიშვილმა მთავრობის სხდომის დასრულების შემდეგ ჟურნალისტებს განუცხადა. ინფორმაციას რეგიონული განვითარებისა და ინფრასტრუქტურის სამინისტრო ავრცელებს.
„არაერთხელ გვითქვამს, რომ ანაკლიის ღრმაწყლოვანი პორტი ჩვენს ქვეყანას სჭირდება ეკონომიკური უსაფრთხოებისთვის და ზოგადად, ლოგისტიკური პოტენციალის სრულად გამოყენებისთვის. ეს პროექტი ეკუთვნის სახელმწიფოს და არა რომელიმე კერძო ინვესტორს. სწორედ სახელმწიფომ გამოაცხადა ინტერესთა გამოხატვა ჯერ კიდევ 2014 წელს და საინვესტიციო ხელშეკრულების მიხედვით, 2020 წლის ბოლოსთვის უნდა გვქონდეს ოპერირებაში პორტი. სამწუხაროდ, ეს შედეგი ვერ მივიღეთ და ამის პერსპექტივაც არ ჩანს. ამით არის განპირობებული კონკრეტულ ინვესტორთან ხელშეკრულების შეწყვეტა და უფრო სერიოზული, ფინანსურად ძლიერი ინვესტორის მოძიება, რომელიც უზრუნველყოფს იმ შედეგს, რაც ჩვენ ყველას გვჭირდება,“ - აღნიშნა მაია ცქიტიშვილმა.
მისივე თქმით, არსებული ხელშეკრულება სახელმწიფოს არ უზღუდავს ახალი ინვესტორის მოძიების პროცედურის დაწყებას, ანაკლიის განვითარების კონსორციუმს კი დარიცხული პირგასამტეხლოს გადახდა მოუწევს.
„უკვე ნაპატიებია 10 მილიონ დოლარზე მეტი პირგასამტეხლო, რაც სახელმწიფოს მხრიდან გაწეული შეღავათია. დღეის მდგომარეობით კონსორციუმს კიდევ აქვს დარიცხული გარკვეული პირგასამტეხლო და შესაბამისად, მისი ანაზრაურების საკითხი, ისევე როგორც სხვა იურიდიული პროცედურები, ბუნებრივია, დაიწყება. ეს გულისხმობს იმასაც, რომ კონსორციუმმა სახელმწიფოს უნდა დაუბრუნოს გადაცემული მიწები და სხვა საპროექტო დოკუმენტაცია. ეს პროცედურები გაწერილია ხელშეკრულებაში და ზედმიწევნით მივყვებით ხელშეკრულების მოთხოვნებს, “ - განაცხადა მაია ცქიტიშვილმა.