ჩვენ, ყველა უნდა უზრუნველვყოთ ის, რომ ყველა საჯარო სამსახური მუშაობდეს და ამ მიმართულებითაც, რა თქმა უნდა, შემოსავლების სამსახურიც არის ერთ-ერთი მნიშვნელოვანი ელემენტი ამ ჩვენი საერთო სახელმწიფო მოწყობის, - ამის შესახებ რეგიონული განვითარებისა და ინფრასტრუქტურის მინისტრმა მაია ცქიტიშვილმა ტვ პირველისა და მთავარი არხისთვის ინკასოს დადებასთან დაკავშირებით განაცხადა.
მაია ცქიტიშვილის თქმით, როდესაც საუბარია იმ ვითარებაზე, რა ვითარებაშიც ვიმყოფებით, მაშინ, როდესაც მთავრობა აწესებთ ამა თუ იმ შეზღუდვას ბიზნესის საქმიანობაზე, ამასთან ერთად, ყველას კარგად უნდა ესმოდეს, რომ განსაკუთრებით ამ ვითარებაში, ძალიან მნიშვნელოვანია რომ ყველა სახელმწიფო სტრუქტურა, მთლიანობაში სახელმწიფო აპარატი და სახელმწიფო, ფუნქციონირებდეს გამართულად.
„როდესაც ამაზე ვსაუბრობთ, მნიშვნელოვანია, როგორც ჩვენი კომუნალური სამსახურების, ტრანსპორტის და ყველა სხვა სექტორის აუცილებელი, დენის ,გაზის, ინტერნეტის, მობილური კავშირის ფუნქციონირება, ამასთან ერთად, ძალიან მნიშვნელოვანია, რომ მთლიანად მთელი ის ინსტიტუციური და სახელმწიფო სტრუქტურები ფუნქციონირებდნენ გამართულად და აკეთებდნენ თავის საქმეს.
ამ ნაწილშიც, რა თქმა უნდა, შემოსავლების სამსახური ფუნქციონირებს გამართულად და ეს უნდა გაგრძელდეს, - განაცხადა მაია ცქიტიშვილმა.
როგორც ვიცე-პრემიერმა აღნიშნა, ამ ეტაპზე, ტელევიზიებს აქვთ აბსოლუტურად იგივე ადგილი იმ ეკონომიკის სექტორში, როგორც ყველა დანარჩენ ბიზნეს სუბიექტს.
„ჩემი შეფასება არის ის, რომ ყველა იმ სექტორმა, რომელსაც უშუალოდ შეეხო კორონავირუსის ეპიდემია, მიიღო მიზნობრივი დახმარება. მიიღო ის ეკონომიკური პაკეტი, რომელიც ჩვენ სულ ერთი კვირის წინ შევთავაზეთ ბიზნესს. იცით, რომ ტურისტულ ბიზნესს, სატრანსპორტო და შესაბამისად თითოეულ იმ სექტორს და ეს ეხებოდა, თუ არ ვცდები 18 000 ბიზნეს სუბიექტს, ძალიან დიდი პაკეტი იყო იმ ორგანიზაციების, ვისაც უშუალოდ შეეხო კორონავირუსის ეპიდემია და აქედან გამომდინარე, ჩვენ ერთი კვირის წინ შევთავაზეთ ბიზნესს, როგორც საკომპენსაციო პაკეტი, ასევე ეკონომიკის სტიმულირების დამატებითი ზომები.
როდესაც ჩვენ ვსაუბრობთ ტელევიზიებზე, ტელევიზიები, რა თქმა უნდა, ამ პაკეტში არ იყო უშუალოდ. ძალიან ბევრი სხვა ჩვენი ბიზნესი არის ამ ეტაპზე, რა თქმა უნდა, დაზარალებული და დაზიანებული, ზოგადად ეკონომიკის ამ მდგომარეობის გათვალისწინებით", - განაცხადა მაია ცქიტიშვილმა.
ინფრასტრუქტურის მინისტრის თქმით, დღევანდელი შეხვედრა ეძღვნებოდა იმას, რომ მთავრობამ უნდა შესთავაზოთ კიდევ დამატებით სექტორებს, დამატებითი საკომპენსაციო ან სტიმულის ზომები.