პარლამენტის გარემოს დაცვისა და ბუნებრივი რესურსების კომიტეტის თავმჯდომარე, მაია ბითაძე კავკასიის გარემოსდაცვითი არასამთავრობო ორგანიზაციების ქსელის (CENN) წარმომადგენლებს შეხვდა, - ამის შესახებ ინფორმაციას საქართველოს პარლამენტის პრესსამსახური ავრცელებს.
მათივე ინფორმაციით, შეხვედრაზე ყურადღება ძირითადად სამომავლო თანამშრომლობის საკითხებს დაეთმო, განსაკუთრებით კი საზოგადოების აქტიურ ჩართულობას კლიმატის ცვლილებასთან ბრძოლის მიმართულებით.
დეპუტატის თქმით, CENN-თან თანამშრომლობა დროულია.
„ძალიან მნიშვნელოვანი შეხვედრა გვქონდა კავკასიის გარემოსდაცვითი არასამთავრობო ორგანიზაციების ქსელის წარმომადგენლებთან. ვისაუბრეთ სამომავლო თანამშრომლობაზე, მათ შორის, კლიმატის ცვლილების გამოწვევების სფეროში საზოგადოების ჩართულობის ხელშეწყობის კომპონენტზე. ძალიან მნიშვნელოვანია არასამთავრობო სექტორისა და ასევე საერთაშორისო ორგანიზაციების ჩართულობა, რომლებიც განსაკუთრებით დიდ ადამიანურ და ფინანსურ რესურსს ხარჯავენ იმისთვის, რომ საქართველოში კლიმატის ცვლილების საკითხები გააქტიურდეს, როგორც ეკონომიკური განვითარების მიმართულებით, ასევე მდგრადი და მედეგი ინფრასტრუქტურული პროექტების განხორციელების კუთხით. შესაბამისად, თანამშრომლობა CENN-თან არის დროული, განსაკუთრებით იმ პროექტის ფარგლებში, რომელსაც ევროკავშირი აფინანსებს, სადაც სამოქალაქო საზოგადოების ჩართულობის ხელშეწყობა განხორციელდება კლიმატის ცვლილების საკითხებში გურიაში, იმერეთში, რაჭა-ლეჩხუმსა და კახეთში“, - განაცხადა მაია ბითაძემ.
imedinews.ge