მოსახლეობიდან თითქმის 100%-იანი ამოღებაა ნარჩენების მოსაკრებლის და ამ მიმართულებით, რა თქმა უნდა, არანაირ ცვლილებას მუნიციპალიტეტი არ გეგმავს. თუმცა, კერძო სექტორი ნარჩენების დიდი ოდენობით წარმომქმნელია და ამ კუთხით ჩვენ ნარჩენების მოსაკრებლის ამოღების თვალსაზრისით ძალიან ცუდი მდგომარეობა გვაქვს, - ამის შესახებ თბილისის მერის მოადგილე მაია ბითაძემ დედაქალაქის მთავრობის სხდომის დასრულების შემდეგ ჟურნალისტებს განუცხადა.
მისი თქმით, დედაქალაქის მთავრობა უცხოელ ექსპერტებთან ერთად მოსაკრებლის დაანგარიშების წესზე მუშაობას იწყებს.
„ნარჩენების მართვა, როგორც ვთქვი, ჩვენი ერთერთი მთავარი პრიორიტეტია და დაახლოებით 40-დან 60%-მდე გაიზარდა დაფინანსება მუნიციპალიტეტის, საფინანსო ინსტიტუტების მხრიდან, რომლებსაც ჩვენ მივმართავთ, როგორც ნარჩენების პოლიგონის, ასევე ნაგავმზიდი მანქანების, ზოგადად ნაგავმზიდი ტექნოლოგიების გადაიარაღების თვალსაზრისით. თბილისი ყოველდღიურად იზრდება და შესაბამისად, იზრდება დასუფთავების სერვისის გაწევის ვალდებულება, რაც ჩვენ ვფიქრობთ, რომ უნდა იყოს მიწოდებული უმაღლეს დონეზე, მითუმეტეს, რომ ნარჩენების მართვა არის ერთ-ერთი მთავარი პრიორიტეტი ასოცირების ხელშეკრულებიდან გამომდინარე. შესაბამისად, ამ კონტექსტში ჩვენ მერის დავალებით დავიწყებთ მუშაობას ნარჩენების მოსაკრების ტარიფის მეთოდოლოგიის გადახედვაზე, რომელიც 2006 წელს არის დადგენილი და აბსოლუტურად მოძველებულია. ბოლო მონაცემებით, იკვეთება ზუსტი ინფორმაცია იმის თაობაზე, რომ მოსახლეობიდან თითქმის 100%-იანი ამოღებაა ნარჩენების მოსაკრებლის და ამ კუთხით, რა თქმა უნდა, არანაირ ცვლილებას მუნიციპალიტეტი ფიზიკურ პირებთან ან მოსახლეობასთან მიმართებით არ გეგმავს. თუმცა, კერძო სექტორი, რომელიც ნარჩენების დიდი ოდენობით წარმომქმნელია, ამ კუთხით ჩვენ ნარჩენების მოსაკრებლის ამოღების თვალსაზრისით ძალიან ცუდი მდგომარეობა გვაქვს. მათ შორის, ქვეაბონენტებად დარეგისტრირების შემთხვევაში, საერთოდ იკარგება კვალი, ვინ არის ნარჩენების მოსაკრებლის გადამხდელი და ასევე, ნარჩენების მოსაკრებლის ოდენობა იურიდიულ პირებთან მიმართებით, როგორც მერმა აღნიშნა, იმდენად მცირეა, თავი დავანებოთ იმას, რომ ამოღება რთულია, პრაქტიკულად გამოდის, რომ მოსახლეობის, ანუ ფიზიკური პირების მიერ გადახდილი თანხის საფუძველზე ხდება სერვისის გაწევა, მათ შორის იურიდიული პირებისთვის. შესაბამისად, ჩვენ გვყავს უცხოური ექსპერტები, მათთან ერთად დავიწყებთ ამ მოსაკლების დაანგარიშების წესზე მუშაობას და ვფიქრობთ, რომ სერვისის გაუმჯობესების მიზნით და მათ შორის იმ კუთხით, რომ მოსახლეობის გადახდილი საფასური არ ფარავდეს იურიდიული პირების ნარჩენების წარმოქმნისა და უდილიზაციის პროცესს და მივიღებთ ჯანსაღ გადაწყვეტილებას“,- განაცხადა ბითაძემ.
IPN.GE