მეწარმე მაია კაცაძეს რთულ პერიოდში უწევს საქმიანობა. ,,ბავშვთა სამყაროს“ ყოფილ მოიჯარეს მთელი ქონება ხანძრისას გაუნადგურდა. თუმცა საქმიანობა არ გაუჩერებია. დღესდღეობით იგი MAI MAI GEORGIA -ს ბრენდით ქალისა და მამაკაცის ჩანთებს კერავს, ასევე საკურიერო ჩანთების ერთ-ერთი პირველი მწარმოებელია საქართველოში.
მცირე მასშტაბის საწარმომ ქართული ბაზარზე თავისი ნიშა უკვე დაიკავა, ფაქტობრივად ფერფლიდან აღსდგა, თუმცა მთავარი გამოწვევა, რომ ბიზნესი გაფართოვდეს, ჯერჯერობით მოუგვარებელი დარჩა ადმინისტრაციული ბარიერის გამო.
მაია კაცაძე თხოვნით მიმართავს მერიას, თავისსავე კერძო მიწის ნაკვეთზე მისცენ მშენებლობის ნებართვა, რითაც მომავალ განვითარებასა და წარმოების მნიშვნელოვან ზრდას შეძლებს.
,,ბავშვთა სამყაროში“ 12 ადამიანი მყავდა დასაქმებული და დღგ-ს გადამხდელ საწარმოს წარმოვადგენდი. ამ ეტაპზე მცირე მეწარმის სტატუსით ვმუშაობ. ხანძარმა მთელი ჩემი ბიზნესი პირწმინდად გაანადგურა. ვფლობ მიწის ნაკვეთს ლისის ტერიტორიაზე, სადაც საწარმოს მშენებლობის უფლებას არ მაძლევენ. ამიტომ იძულებული ვარ საწარმო და მე პირადად ვიმყოფებოდე ქირით. მომგებიანი საწარმო გამინადგურდა, ვითხოვე ელემენტარული დახმარება, რომ კერძო საკუთრებაზე მოეცათ საწარმოს აშენების უფლება და ამასაც ვერ მივაღწიე. პროკურატურისგან აღიარებული ვარ, როგორც დაზარალებული, ნაცრიდან აღვადგინე წარმოება“, - ამბობს ,,კომერსანტთან“ მაია კაცაძე.
შეგახსენებთ, რომ ხანძარი ,,ბავშვთა სამყაროს“ ტერიტორიაზე 2017 წელს გაჩნდა. მაია კაცაძის 40 000 დოლარად (ეკვივალენტი ლარში) შეფასებული ქონება მთლიანად განადგურდა. როგორც სხვა მოვაჭრეებს, კაცაძეს 3000-ლარიანი კომპენსაცია გადაეცა.
როგორც მეწარმე ამბობს, ეს არ იყო ზარალის მინიმუმიც კი, არამედ ის თანხა, რომ ეარსება, რადგან საკუთარი ქონებიდან არაფერი დარჩა.
საწარმოს გაფართოების შემთხვევაში, როგორც მაია კაცაძე ,,კომერსანტთან“ აცხადებს, შეძლებს, რომ პირველსავე ეტაპზე 5-6 -ჯერ გაზარდოს წარმოება და 10-ზე მეტი ადამიანი დაასაქმოს.
ცნობისთვის, MAI MAI GEORGIA არის ახალი ქართული ბრენდი, რომელიც გთავაზობთ ჩანთების მრავალფეროვან კატალოგს, მათ შორის საკურიერო ჩანთებს.
მარი ჩიტაია