ლუქსემბურგის საინვესტიციო ფონდები ფინანსური „შავი ყუთია“, რომელიც ეხმარება ადამიანებს ფულის გათეთრებასა და გადასახადების თავიდან არიდებაში. ამის შესახებ Reuters-ის ცნობით, OpenLux-ის ჟურნალისტურ გამოძიებაშია ნათქვამი. აღნიშნული მედიაჯგუფი აერთიანებს ისეთ გამოცემებს, როგორებიცაა Le Monde, Le Soir-ი, Miami Herald-ი და Sueddeutsche Zeitung-ი. მათ ოთხი მილიონი დოკუმენტი შეისწავლეს და 260 000 კომპანიის ჩანაწერი, რომელიც დაკავშირებულია ლუქსემბურგის 4.5 ტრილიონი ევროს მოცულობის საინვესტიციო ფონდებთან 1995 წლიდან 2020 წლამდე.

ლუქსემბურგის კანონმდებლობით, საინვესტიციო ფონდებმა უნდა მიუთითონ ყველა ბენეფიციარის ან ინვესტორის სახელი რეგისტრატურაში, რათა დაეხმარონ შესაბამის უწყებებს გადასახადების თავიდან არიდებასა და ფულის გათეთრებასთან ბრძოლაში.

თუმცა, კერძო საინვესტიციო ფონდების 80%-ს არ აქვს გაცხადებული თუ ვინ არიან აქციების რეალური მფლობელები, – აცხადებენ გამომძიებლები.

„ერთად რომ ავიღოთ, ლუქსემბურგის ფონდების მნიშვნელოვანი ნაწილი კანონის მიხედვით მფლობელების ინდენტიფიცირებას არ ახდენს. ინდუსტრია, რომლის მართვაშიც ტრილიონობით ევროს ოდენობის აქტივია, ოპერირებას „შავი ყუთივით“ განაგრძობს“, – აღნიშნულია გამოძიებაში, რომელიც მოუწოდებს ლუქსემბურგის მთავრობას და ევროკომისიას რომ აქციების მფლობელის დეფინიცია კიდევ უფრო შემჭიდროვდეს და დაზუსტდეს.

თავად ლუქსემბურგის მთავრობაში კი აცხადებენ, რომ შესაბამისობაში არიან ევროკავშირთან და საერთაშორისო კანონდმებლობასთან გადასახადების თავიდან არიდებასთან ბრძოლის კუთხით.

ცნობისთვის, 2019 წელს საერთაშორისო სავალუტო ფონდმა ლუქსემბურგი, რომელსაც მხოლოდ 600 000-იანი მოსახლეობა ჰყავს, დაასახელა მსოფლიოში წამყვან ქვეყნად გადასახადების სიმცირის კუთხით, რომელიც იმდენ უცხოურ ინვესტიციებს იზიდავს, რამდენსაც მაგალითად აშშ.

forbes.ge