„ეროვნული ბანკის ინტერვენციები არ არის გრძელვადიანი გამოსავალი, საჭიროა ეკონომიკის სტრუქტურული რეფორმა“, - ამის შესახებ კომერსანტს „ნატახტარის“ კორპორატიულ საქმეთა დირექტორმა ნიკოლოზ ხუნძაკიშვილმა განუცხადა. მისი თქმით, ეროვნული ვალუტის გაუფასურება, ლუდის ბაზარზე მნიშვნელოვან გავლენას ახდენს, რადგან სექტორი ალკოჰოლური სასმლის წარმოებისთვის ნედლეულს უცხოურ ვალუტაში ყიდულობს. იგი განმარტავს, რომ ქვეყანაში ტურიზმი პრაქტიკულად განულებულია ხოლო პირდაპირი უცხოური ინვესტიციები უკიდურესად შემცირებული, მისი თქმით, ეს ყველაფერი სადღაც უნდა დაკომპენსირებულიყო და კომპენსირდება ვალუტის გაცვლითი კურსის ხარჯზე.
„ლარის გაუფასურება არა მარტო ჩვენ კომპანიაზე, არამედ ინდუსტრიაზე და ეკონომიკაზე აისახება. ჩვენ ნედლეულის დიდი ნაწილს და შესაფუთ მასალებს უცხოურ ვალუტაში ვყიდულობთ ასევე, მსხვილი კომპანიებს ბუნებრივი აირის პირდაპირი შესყიდვა აქვთ, რომელის ფასიც დოლარში დაფიქსირებული. ეს ყველაფერი ჯამში პროდუქციის თვითღირებულებაზე ახდენს გავლენას. მიმდინარე პროცესები ფასზე რა გავლენას მოახდენს ჯერ თქმა ძნელია, ხშირ შემთხვევაში კომპანიები ფასის ზრდას ერიდებიან ცდილობენ შიდა რეზერვების საშუალებით ფასი დაარეგულირონ, ამ კონკრეტულ შემთხვევაშიც ასე იქნება, თუმცა ზოგადად პროდუქციის ფასი მოიმატებს.
ფასის ზრდა მსხვილი კომპანიებისთვის კომპლექსური თემაა. ლუდის ინდუსტრიაში ჩვენ ვართ ყველაზე მსხვილი ექსპორტიორები, შესაბამისად იმპორტის შედეგად დოლარი შემოდის და უფრო დიდ კომპანიებს გვიადვილდება ბალანსის გაკეთება. იმპორტის საშუალებით უფრო მეტი თანხა შემოგვდის რომლითაც აკომპენსირებ აქ დანაკარგს. რისკების შეფასების თვალსაზრისით, ამ ტიპის რისკები ყოველთვის გათვლილი გვაქვს. აქედან გამომდინარე ძალიან მნიშვნელოვანია ხელისუფლების როლი, ექსპორტის წახალისების თვალსაზრისით“, - განმარტავს ნიკოლოზ ხუნძაკიშვილი.
ლუდის მწარმოებელი ყველაზე მსხვილ კომპანიის კორპორატიულ საქმეთა დირექტორი აცხადებს, რომ მოსახლეობის მსყიდველთუნარიანობა შემცირებულია, შესაბამისად მისი თქმით, ლუდის ბაზარზე ეკონომ სეგმენტზე გადასვლის ტენდენცია შეინიშნება.
„Corona, franziskaner, Miller, Beck's, stella artois, leffe, hoegaarden- ეს ის ბრენდებია რომელიც ჩვენს მიერაა იმპორტირებული და მაღალ სეგმენტზეა გათვლილი. ამ შემთხვევაში 2 %-იანი ფასის ცვლილება არ მგონია მომხმარებელზე უარყოფითად აისახოს. რეალურად, რომ ვთქვათ იმპორტი არაა ბაზრის დიდი წილი, თუმცა იმ ეკონომ სეგმენტზე რომელზეც დღეს მოთხოვნაა დიდი ნედლეულის გაძვირება გავლენას მოახდენს. მომხმარებლის მსყიდველთუნარიანობა შემცირებულია, შესაბამისად არის მეინსტრიმიდან ეკონომ სეგმენტზე გადასვლის ტენდენცია. სუპერ პრემიუმს და პრემიუმს თავის მომხმარებელი დარჩა, ვსაუბრობ მაღაზიაში არსებულ პროდუქციაზე. ხოლო სარესტონო ბიზნესის გაჩერებამ, ინდუსტრიის სეროზული დარტყმა მიაყენა არა მარტო ლუდის, არამედ ლიმონათის მიმართულებითაც, რადგან ლიმონათიც ძალიან მნიშვნელოვანი პროდუქტია ჩვენს პორტფელში“, - აცხადებს ნიკოლოზ ხუნძაკიშვილი.