კორონავირუსის პანდემიის პირობებში შექმნილი არასტაბილური ვითარების გამო, მანდარინის ექსპორტიორი კომპანიების საქართველოდან პროდუქციის გატანის საკითხს სიფრთხილით ეკიდებიან. როგორც „აჭარა კეიდინგ გრუპის“ დამფუძნებელი კახა შავაძე აცხადებს, მას გლეხებისა და ფერმერებისგან ექსპორტისთვის განკუთვნილი მანდარინის შესყიდვა ამ დრომდე არ დაუწყია.
„ჩვენ სხვადასხვა ხილს რუსეთში ვაგზავნით, ძირითადად სავაჭრო ქსელებთან ვმუშაობთ და ამიტომაც ჩვენი პროდუქტი მაღალხარისხიანი, შესაბამისად, შედარებით ძვირია. ამ წელს პანდემიის გამო არ ვრისკავთ და ძალიან ფრთხილად ვმუშაობთ. ექსპორტზე მხოლოდ 5 სატვირთო მანქანა გავაგზავნეთ, რაც ძალიან ცოტაა. დღესითვის ჩვენი ექსპორტი ძალიან შემცირებულია იმიტომ, რომ არ გვაქვს გარანტია ხვალ სადმე ლოკდაუნი არ გამოცხადდება და მთელი მანდარინი ხელში არ შეგვრჩება. ამ დროს კი მოსავალი ძალიან კარგია“ - ამბობს კახა შავაძე
მსოფლიოში შექმნილი ვითარების გამო „აჭარა კეიდინგ გრუპის“ დამფუძნებელი პროდუქტის მიღების დაწყებას არ ჩქარობს.
„მანდარინის სეზონი 1-1,5 თვე გრძელდება, მომზადებას კი ინვესტიციები სჭირდება. პროდუქტის შესაფუთი მასალების ყიდვა, ათასი საორგანიზაციო საკითხია. მე რომ ყველა ეს ხარჯი გავწიო და უცბათ რომელიმე ქვეყანაში ლოკდაუნი გამოცხადდეს და საზღვრები დაიხუროს გავკოტრდები. ამიტომაც პრაგმატული მიზეზების გამო თავს ვიკავებ. ყველა რისკებს ვითვლი და თავს ვიზღვევ, მირჩევნია არ მოვიგო, ვიდრე წავაგო. ამიტომაც, სავარაუდოდ, ამ წელს მანდარინის ექსპორტზე არ ვიმუშავებ“ - განაცხადა კახა შავაძემ.
2019 წელს რუსეთში მანდარინის ექსპორტმა 20 000, უკრაინაში 5 200 ხოლო სომხეთში 4400 ტონა შეადგინა.
წყარო: east-fruit.com
მოამზადა თენგიზ აბლოთიამ