ტექნოლოგიების სფეროში მომუშავე საერთაშორისო კომპანიაა Lineate-მა საქართველოში რეგიონული ოფისი 2022 წლის ზაფხულში გახსნა და უკვე 80 დასაქმებული ჰყავს.
როგორც რადიო „კომერსანტის“ გადაცემა „კომერსანტის დილას“ ეთერში Lineate-ის რეგიონულმა დირექტორმა გიორგი ციკოლიამ განაცხადა, კომპანიამ გრძელვადიანი ანალიზის შედეგად გადაწყვიტა, რომ საქართველო იყოს ის ადგილი, რომელიც კომპანიის განვითარების შემდეგ ეტაპს უზრუნველყოფს.
Lineate-ი 10 წლის წინ აშშ-ში შეიქმნა და ის მომხმარებელზე მორგებულ კომპიუტერულ პროგრამებს ქმნის, რომლებიც მათ ურთულესი ბიზნეს ამოცანების, უმთავრესად კი კომპლექსური მონაცემების მიერ გამოწვეული პრობლემების, გადაჭრაში ეხმარებათ.
„ჩვენ ვეცდებით, რომ ჩვენი ხმა ამ ინდუსტრიით დაინტერესებულ ადამიანებამდე მივიტანოთ და ავუხსნათ, რომ ტექი არის მომავალი, ჩვენნაირი ქვეყნისთვის შიდა ბაზარი საკმაოდ მწირია და აუცილებელია ისეთი ინდუსტრიები განვითარდეს, რომლებიც გლობალურ ბაზარზეა ორიენტირებული და ტექი ზუსტად ის ინდუსტრიაა, რომელიც ამის საშუალებას გვაძლევს,“ — განაცხადა გიორგი ციკოლიამ.
აღსანიშნავია, რომ კომპანიის სერვისები ორიენტირებულია არა ადგილობრივ, არამედ საერთაშორისო ბაზარზე. ამ ეტაპზე კომპანიას 99%-ით ამერიკელი და ევროპელი დამკვეთები ჰყავს.
„საქართველოში არსებობს ტექ კომპანიის სტატუსი. ჩვენს კომპანიას ეს სტატუსი 1 თვის წინ მიენიჭა და ამ სტატუსის ფარგლებში რამდენიმე ვალდებულება გვაქვს. პირველი ვალდებულება არის ის, რომ ყველა საერთაშორისო კომპანია აუცილებლად გარე ბაზარზე იყოს ორიენტირებული და შიდა ბაზარზე აქტივობა შეეზღუდოს (ეს იმიტომ, რომ შიდა ბაზარზე არასწორი კონკურენცია არ მოხდეს და საერთაშორისო კომპანიებს უპირატესობა არ მიეცეს). საერთაშორისო სტატუსის მქონე კომპანიების მეორე ვალდებულებაა, რომ თანამშრომლები საქართველოში ჰყავდეს და არა სხვა ქვეყნებში. რაც ძალიან კარგია. რადგან ის ინვესტიცია, რომელსაც ჩვენ თანამშრომლებში ვდებთ და შემდეგ ის შემოსავალი, რომელსაც ჩვენს კომპანიაში დასაქმებულები მიიღებენ, შიდა ბაზარს მოხმარდება და ქვეყნის ეკონომიკას გააძლიერებს,“ — თქვა გიორგი ციკოლიამ.
კომპანიას საქართველოში უკვე 80 დასაქმებული ჰყავს. წლის ბოლომდე მათი რიცხვი 100-ამდე გაიზრდება. 2023 წელს კი ამ ციფრის გაორმაგება იქნება შესაძლებელი.
გარდა ამისა, კომპანიის დაარსების პირველივე დღიდან ფუნქციონირებს Lineate-ის განვითარების სკოლა, რომელიც შიდა კადრებს და სხვა დაინტერესებულ პირებს საშუალებას აძლევს, რომ საჭირო უნარები შეიძინონ და შემდეგ საქმიანობა კომპანიაში გააგრძელონ.
როგორც ციკოლიამ განაცხადა, 2023 წლის თებერვლის ბოლოდან ასეთი სკოლა საქართველოშიც დაიწყებს მუშაობას, რაც ტექნოლოგიების სფეროში პროფესიონალების ზრდას შეუწყობს ხელს.
„ამ მიმართულებით მუშაობა უკვე დავიწყეთ. ვთანამშრომლობთ დონორ ორგანიზაციებთან (USAID-ი საკმაოდ აქტიურია ამ მიმართულებით), სახელმწიფო უწყებებთან, კერძო სექტორთან და უნივერსიტეტებთან. რამდენიმე პროექტზე ჩამოვყალიბდით, პრესელექციის პროცესს ვიწყებთ და ვფიქრობთ, რომ თებერვლის ბოლოდან პირველ პროგრამას გავუშვებთ“, განაცხადა ციკოლიამ.
მოამზადა მაკა ბიბილაშვილმა