„სავაჭრო პროცესი ჩვეულ რეჟიმში მიმდინარეობს, ჯერჯერობით არავის უთქვამს, რომ ფასები გაიზარდა“, - ასე აფასებს წლიურ ინფლაციის განაკვეთს „ლილო მოლის“ გენერალური დირექტორი გიორგი კვარაცხელია. ბიზნესმენი აცხადებს, რომ ბოლო პერიოდში ლარის გაცვლითი კურსის მერყეობის ამპლიტუდაც არ ყოფილა დიდი. შესაბამისად, ამბობს, რომ ბაზარი სტაბილურია. ამიტომ, მისივე თქმით, ჯერჯერობით პროცესი ნორმალურად მიმდინარეობს. „კომერსანტთან“ საუბარში გიორგი კვარაცხელია ამბობს იმასაც, რომ ერთ-ერთ უმსხვილეს სავაჭრო ცენტრზე გავლენა ჩინეთიდან კიდევ უფრო გაძვირებულ იმპორტს არ მოუხდენია.
„იქიდან გამომდინარე, რომ ჩვენ იმპორტიორები არ ვართ, დეტალური ინფორმაცია არ მაქვს. პროცესი კონკრეტულად ჩვენზე არ აისახება, მაგრამ მეწარმეს თვითღირებულება თუ გაეზრდება, პროდუქტს უფრო ძვირად გაყიდის. თუმცა, შემიძლია გითხრათ, რომ ჩვენთან ვაჭრობის შეფერხება არ არის“, - აცხადებს გიორგი კვარაცხელია.
ბიზნესმენი იხსენებს, რომ პანდემიის პერიოდი კომპანიისთვის ძალიან მძიმე იყო, რადგან „ლილო მოლი“ წლის განმავლობაში დაახლოებით 6 თვე დახურული იყო. დღეს ამბობს, რომ რთულ პერიოდს გაუძლეს. გიორგი კვარაცხელიას თქმით, შეღავათებით მეწარმეებსაც გააძლებინეს. მისი განცხადებით, მაღაზია არავის დაუხურავს, ამ ეტაპზე ყველა ფეხზე დგას და მომავალს ყველა იმედიანად უყურებენ.
„მთავარია ქვეყანაში შეზღუდვები აღარ დაწესდეს. მაქსიმუმს ვაკეთებთ იმისთვის, რომ სტაბილურობა შევინარჩუნოთ, შესაბამისად ჩვენთან ინტენსიური ტესტირებები კეთდება, რათა ვირუსის სწრაფი აღმოჩენა მოხდეს. ასევე მოვაწყვეთ პატარა კლინიკა, რომელშიც ვაქცინაცია მიმდინარეობს. ამ ყველაფრის ფონზე, შოპინგი მშვიდად, წესების დაცვით მიმდინარეობს. ჯერჯერობით მნიშვნელოვანი საინვესტიციო გეგმა არ გვაქვს. ამ პერიოდში რაც გავაკეთეთ არის ის, რომ ჩავუშვით აპლიკაცია, რომელიც მომხმარებელს უადვილებს 35 ჰა-ზე მაღაზიის მოძებნას. ჩვენთან 6 000-ზე მეტი სავაჭრო ობიექტია. შესაბამისად, კონკრეტული საქონლის მოძებნა ბევრს უჭირს. ერთადერთი რაც ამ გაჭირვების პერიოდში მოვასწარით, ეს იყო. ახლა ფეხზე ვდგებით და მომავალში ვიფიქრებთ უფრო მნიშვნელოვან ინვესტიციებზე“, - ამბობს გიორგი კვარაცხელია.
„ლილო მოლის“ გენერალური დირექტორს ვკითხეთ, დაიწყო თუ არა სავაჭრო ცენტრმა „შავი პარასკევისთვის“ და ახალი წლისთვის მზადება. რაზეც კვარაცხელია გვპასუხობს, რომ მათთან „ყოველთვის შავი პარასკევი და ახალი წელია“, რადგან მათ მეწარმეებს ფასდაკლებები განსაკუთრებული მითითების და რეკლამის გარეშე აქვთ.