„1 ივნისიდან  „ლილო  მოლი“ გაიხსნა და დილის 7 საათიდან სავაჭრო ობიექტი სრული დატვირთვით მუშაობს“,- ამის შესახებ „კომერსანტს“ ლილო მოლის გენერალური დირექტორი გიორგი კავარაცხელია ესაუბრა.

გიორგი კვარაცხელიას ინფორმაციით, „ლილო მოლმა“, მუშაობა სრული დატვირთვით და  რეგულაციის ყველა წესის დაცვით განაახლა, რომელიც მათ ჯანდაცვის სამინისტრომ დაუწესა.  როგორც „კომერსანტთან“ საუბარში კვარაცხელია განმარტავს, სავაჭრო ობიექტის არცერთ მოიჯარეს მაღაზია არ დაუტოვებია.

„დღეს დილით 7 საათიდან გაიხსნა ლილო მოლი. ჯანდაცვის სამინისტროს მიერ დაწესებული  ყველა რეკომენდაცია გავითვალისწინეთ.  დღეს მთავარი ამოცანა ნაკადების მართვა იყო, რომელსაც წარმატებით გავართვით თავი.  შემოსასვლელში, ყველას თერმოსკრინინგი უტარდება, არც ერთი მომხმარებელი და მომუშავე პირი სპეციალური პირბადის გარეშე  დახურულ სივრცეში ვერ შემოდის. არც ტრანსპორტის პრობლემა შეინიშნება, შეუფერხებლად მოძრაობს, როგორც სამარშუტო ასევე კერძო ავტომობილები“,-აღნიშნა კვარაცხელიამ.

„ლილო მოლის“ გენერალური დირექტორის თქმით, სავაჭრო ობიექტში მაღაზიების 90% მუშაობა განაახლა, 10% კი რამდენიმე დღეში დაუბრუნდება სამუშაო  ადგილს. რაც შეეხება იჯარას, ჩვენ ხელს ვუწყობთ ჩვენს მეწარმეებს და არც ყოველთვიური გადასახადის გაზრდას ვაპირებთ.  

„სივრცეში 6500-ზე  მეტი მაღაზიაა და აქედან  90% უკვე გაიხსნა. 10%  კი  რამდენიმე დღეში განაახლებს მუშაობას. დაზუსტებით შემიძლია ვთქვა რომ არც ერთ მოიჯარეს არ დაუტოვებია მაღაზია.  ყველა მათგანის იჯარა უცვლელი დარჩება და არც სამომავლოდ ვგეგმავთ ყოველთვიური გადასახადის გაზრდას.  მარტის თვის სრული იჯარის გადახდის შემდეგ, მათი მდგომარეობა გავითვალისწინეთ და 2 თვის შეღავათი გავუწიეთ. ამ პერიოდში ბევრმა მათგანმა ახალი საქონელიც შემოიტანა, იმ  საბაჟო ტერმინალისა  და ფოსტის დახმარებით, რომელიც ჩვენთან  ოპერირებს,  საქონლის შემოტანაზე პრობლემა არ შეგვქმნია“,-განაცხადა კვარაცხელიამ.

„ლილო მოლის“ გენერალური დირექტორი სავაჭრო ობიექტის არსებულ ზარალზე ვერ საუბრობს და აცხადებს, რომ  ზუსტ რიცხვზე საუბარი ადრეა.

„ ეს პერიოდი მხოლოდ  ორ თვიან ზარალს არ მოიცავს.  იმასაც ვიაზრებთ, რომ 100%  ვერ ავმუშავდებით, რამდენიმე თვე დაკვირვების პერიოდია და ვაჭრობის ტემპიც უნდა გაიზარდოს.  ორ თვიანი პაუზის დროს  ვალები, როგორც  ჩვენ  ასევე მოიჯარეებსაც დაგვიგროვდა და ამ პრობლემის მოგვარებაზე  უნდა ვიზრუნოთ.  მიუხედავად იმისა, რომ დღეს ბევრი ვიზიტორი გვყავს ეს იმას არ ნიშნავს, რომ ყველა მსყიდველუნარიანია.  ეს ის პერიოდია როდესაც თითქმის ყველამ დაკარგა სამსახური და დარჩნენ შემოსავლის გარეშე. ხოლო წლის ბოლოს გაირკვევა რა ოდენობის ზარალზეა კომპანია“,-განაცხადა გიორგი კვარაცხელიამ.

ნათია ლომიძე