ისევ მუქარანარევი ტექსტები, ისევ ცრუ ბრალდებები, ისევ შეურაცხყობა....! ნუთუ სხვა არაფერი შეგიძლიათ ბატონებო? ნუთუ მთელ ამ პიარკამპანიას სხვა მიზანი მართლა არა გააჩნია?!

აბა რა გითხრათ ბატონო მერაბ, ჩემი განცხადების შინაარსი (რომლის ადრესატიც თქვენ არ ყოფილხართ), სწორედ იმას ეხებოდა, რომ ამ ფორმატში არ არის სწორი ურთიერთბრალდებების ფრქვევა და ამისათვის შესაბამისი უწყებები არსებობენთქო, ხოლო საზოგადოებაში არსებული მაღალი ინტერესიდან გამომდინარე, თქვენი მხარის ადვოკატს საჯარო დისკუსიაც შევთავაზე, სადაც პარიტეტის დაცვის და პოზიციების უფრო გასაგებად გადმოცემის საშუალება იქნება და საზოგადოებას უფრო ნათლად დაანახებდა თუ ვინ დგას სიცრუის და სიყალბის მხარეს. თქვენ კი ადექით და ეს სივრცე ისევ მუქარისა და ცრუ ბრალდებების სატყორცნად გამოიყენეთ.

მე სრულად ვიღებ პასუხისმგებლოას იმაზე, რაც წინა წერილში მოგახსენეთ და არაფერი მეშლება! დიახ, როდესაც ჩვენი მხარე სასამართლოს პირველივე სხდომაზე თქვენს დაკითხვას ითხოვდა, თქვენი დამქირავებელი და მისი ადვოკატი, კატეგორიულ უარზე იყვნენ. ეს სწორედ ასეა და თუ ჩემი არ გჯერათ, ძალიან მარტივად შეგიძლიათ გაეცნოთ სხდომის ჩანაწერს (11.07.2019წ. 11.05.56სთ - 11.08.48სთ). ხოლო როდესაც ასეთი პრინციპული წინააღმდეგობაა მოწმის დაკითხვის მიმართ, ეს სხვას არაფერს ნიშნავს გარდა იმისა, რომ არაკეთილსინდისიერ მხარეს, წინასწარ მოუმზადებელი ჩვენების თავიდან არიდება სურს. აღარაფერს ვამბობ იმ ურთიერთგამომრიცხავ პოზიციებზე, რომელიც საბოლოოდ, თქვენი ჩვენებით დააფიქსირეთ. სხვათაშორის, ჩემი ეს პოზიცია, სასამართლოზეც არაერთხელ დავაფიქსირე, მათ შორის თქვენი დასწრებით და ეს მე გუშინ არ გამხსენებია. სწორედ ეს და არა მხოლოდ ეს გახდა თქვენი ჩვენებისადმი უნდობლობის საფუძველი და როდესაც საქმის ზოგად შეფასებას ვახდენთ, მსგავსი დეტალები არ უნდა გვავიწყდებოდეს.

რაც შეეხება იმ ცრუბრალდებებს, რაცას ასე გულმოდგინედ მიყენებთ, მინდა გითხრათ, რომ თუ ცოტა უფრო კარგად მოინდომებთ, მხოლოდ თაღლითური სქემების დალაგებას კი არა, ლიდერფუდიდან ლონდონამდე გვირაბის თხრასაც წარმატებით ჩამიდებთ, ეს ხომ თქვენი ძლიერი მხარეა! ამ მხრივ, რა თქმა უნდა, არ ვაპირებ თქვენთან კამათს და შეგიძლიათ თქვენი წერილის იდეოლოგს გადასცეთ, რომ ჩემი პროვოცირების ეს მდაბიო მცდელობა ისეთივე კრახისთვისაა განწირული, როგორც ყველა სხვა დანარჩენი.
რაც შეეხება ჩემი პროფესიული კვალიფიკაციის შეფასებას, ბატონო მერაბ, უნდა გვესმოდეს, რომ ამისათვის მხოლოდ პოლიციური გამოცდილება საკმარისი არ არის და გაცილებით გონივრული იქნება, თუ ამ მხრივ, ჩვენ ჩვენი შესაძლებლობების ფარგლებში დავრჩებით.

ახლა კი, უნდა დაგემშვიდობოთ და იმედს ვიტოვებ, რომ ცხოვრება კიდევ მოგვცემს ერთმანეთთან შეხვედრის და საუბრის შესაძლებლობას, ისე როგორც ეს ღირსეულ ხალხს შეფერის და არა მაგ შავ პიარზე გათვლილი, მუქარისა და ცრუ ბრალდებებისმექანიზებული მეთოდის გამოყენებით.