„ნაციონალური მოძრაობის“ წევრი რომან გოცირიძე სოციალურ ქსელში წერს, რომ მომავალი 7 წლის განმავლობაში “ლიბერთი ბანკს” ყოველწლიურად ბიუჯეტიდან 15 მილიონ ლარს ჩუქნიან.
მისი აზრით, აღნიშნულ თანხას ჩვენი ჯიბიდან ჩუქნიან, ბანკის და მთავრობის ლობისტი “ექსპერტები”კი ამის გასამართლებლად რიგში ჩადგნენ.
„არავითარი კონკურენტული ტენდერი არ იქნება, საბოლოოდ 1,2 მილიონი კლიენტი და 4 მილარდ ლარამდე ფინანსური რესურსი დარჩება “ლიბერთი ბანკს” და რას დათმობს ამის სანაცვლოდ? წლიური საშუალო 30,6 პროცენტიანი სესხი პენსიონერებისათვის დაიწევს 26 პროცენტამდე. ამ ბანკიდან სესხებს მხოლოდ პენსიონერები არ იღებენ, უამრავი სხვა მსესხებელიც ჰყავს, ასევე მხოლოდ პენსიების თანხები არ არის მისი საკრედიტო რესურსების წყარო, საკმაოდ დიდი სადეპოზიტო ბაზა აქვს. რომ არა პენსიების დარიგება, ეს ბანკი იქნებოდა ერთი პატარა საკრედიტო დაწესება. ამ ბანკს ბანკად აქცევს სწორედაც რომ პენსიონერები. პენსიების და სოციალური შემწეობების ზრდასთან ერთად ყოველწლიურად იზრდებოდა ბანკის მოგება და პენსიონერებისათვის სესხის პროცენტის მცირე ოდენობით შემცირება ბანკის მოგებას იმ ზომით ვერ შეამცირებდა, რომ მცირეოდენი ეჭვიც გაჩენოდათ, უღირდათ თუ არა პენსიების გაცემის ორგანიზება. პოლიტიკოსების მიერ პენსიების ირგვლივ წამოწყებულმა პოპულისტურმა აქტიურობამ( პირველ რიგში სახელისუფლებო პარტიიდან) დიდი, გარანტირებული ლუკმა ჩაუგდო ხელში „ლიბერთი ბანკს“. საბოლოოდ მივიღეთ ის, რაც რუსეთის მთავრობის მეთაურს ვიქტორ ჩერნომირდინს წამოსცდა ერთხელ ხელისუფლების ქმედებებზე: “გვინდოდა როგორც უკეთესად, მივიღეთ როგორც ყოველთვის”, - წერს რომან გოცირიძე.
შეგახსენებთ, საპენსიო სესხების საპროცენტო განაკვეთზე ზედა ზღვარი დაწესდება. საპენსიო სესხებზე საპროცენტო განაკვეთი დაახლოებით 10%-ით მცირდება და დაწესდება განაკვეთზე ზედა – 26%-იანი ზღვარი. სამთავრობო კომისიის გადაწყვეტილებით, პროცესში ჩაერთვება სახელმწიფოც. კერძოდ, ყოველწლიურად გამოიყოფა 15 მლნ ლარი, რომლის ნაწილიც მოხმარდება საკომისიოების განულებას, ნაწილი კი, მაღალმთიან რეგიონებში პენსიის დარიგების ლოგისტიკური ხარჯების დაფარვას მოხმარდება.
პენსიის გაცემასთან დაკავშირებით უახლოეს პერიოდში ახალი კონკურსი გამოცხადდება. კონკურსში მონაწილეობის მისაღებად დაინტერესება უკვე გამოთქვა ორმა ბანკმა – „ლიბერთიმ“ და „საქართველოს ბანკმა“. ბანკებისთვის კონკურსი თებერვლის ბოლოს გამოცხადდება, სადაც გაირკვევა, თუ რომელი ბანკი დაარიგებს პენსიებს.
გადაწყვეტილების შესაბამისად, სახელმწიფო პენსიების დარიგების მომსახურებაში პოტენციურ გამარჯვებულ ბანკს ერთი წლის განმავლობაში 15 მილიონ ლარს გადაუხდის.
სურვილის შემთხვევაში, პენსიონერი შეძლებს პენსიის სხვა, სასურველ ბანკში მიღებას.
ეროვნულ ბანკში უშუალოდ პენსიონერებისთვის ცალკე ცხელი ხაზი შეიქმნება.
სტატისტიკის ეროვნული სამსახურის ინფორმაციით, 2021 წელს, საქართველოში პენსიის და სოციალური პაკეტის მიმღებთა რიცხოვნობამ 971 648 პირი შეადგინა. აქედან, პენსიის (ასაკით პენსია) მიმღები იყო 793 751 პირი, რომელთაგან 71.5 პროცენტი ქალია, ხოლო 28.5 პროცენტი – კაცი.
ამასთან, რეგიონების მიხედვით პენსიის მიმღებთა 29.4 პროცენტი თბილისშია, 16.3 პროცენტი – იმერეთში, 10.8 – პროცენტი სამეგრელო-ზემო სვანეთში, 9.8 პროცენტი – ქვემო ქართლში, 8.9 პროცენტი – კახეთში, დანარჩენ რეგიონებში კი ჯამურად 24.8 პროცენტი ფიქსირდება.
ავტორი: ბელა გელაშვილი
“ლიბერთი ბანკი
