ხორბლის იმპორტის გაძვირების გამო შექმნილი პრობლემების მოგვარების მიმართულებით, სახელმწიფოს მეტი სარგებლიანობის პრინციპით უნდა ესარგებლა, რის შედეგადაც შესაძლებელი იქნებოდა დარგში სამუშაო ადგილების შენარჩუნება, ბიუჯეტში გადასახადების მობილიზება და ხორბლის მარაგების შექმნა. ამის შესახებ ხორბლის იმპორტიორთა ასოციაციის ხელმძღვანელმა ლევან სილაგავამ „ჯეოქეისის“ და კომერსანტის ერთობლივი პროექტის „კომერსანტის კვლევითი ინიციატივა“ პირველ ვებინარზე განაცხადა, რომელსაც ჯეოქეისის მკვლევარი და მედიაჰოლდინგის მმართველი პარტნიორი გიორგი აბაშიშვილი უძღვებოდა.
ლევან სილაგავას თქმით, ხორბლის იმპორტი ნებისმიერ შემთხვევაში მეტ სარგებელს იძლევა ქვეყნისთვის, თუნდაც იმის გამო, რომ სამუშაო ადგილებისა და შემოსავლების გარდა, ქვეყანაში რჩება ქატოც, რომელზეც დღეს ასევე საკმაოდ მაღალი ფასი ფიქსირდება.
მისივე თქმით, რომ მომხდარიყო ხორბლის სუბსიდირება, იგივე წისქვილკომბინატების მიერ გადახდილი გადასახადებიდან, რასაც დაახლოებით 3 მილიონი ლარი დასჭირდებოდა, ქვეყანაში შენარჩუნდებოდა ამ დარგის სამუშაო ადგილები, შეიქმნებოდა ხორბლის სწორი მარაგები და მეტ სარგებელსაც მიიღებდა ქვეყანა.
რაც შეეხება მის დღევანდელ განცხადებას წისქვილკომბინატების გაჩერებასთან და ქვეყანაში ხორბლის მხოლოდ 10 დღის მარაგებთან დაკავშირებით, ლევან სილაგავამ აღნიშნა, რომ ვითარება მის განცხადებაში განმარტებული იყო, თუმცა საინფორმაციო ველზე სკანდალურად გამოჩნდა სათაურში მხოლოდ მარაგებისა და წისქვილების გაჩერების საკითხის გამოტანა.
გიორგი აბაშიშვილის ინიციატივით გამართულ ვებინარში ვებინარში მონაწილეობდნენ სახელმწიფო, კერძო და ანალიტიკური ორგანიზაციების წარმომადგენლები. მათ შორის: ვიქტორ ყიფიანი – ანალიტიკური ცენტრი „ჯეოქეისის“ თავმჯდომარე, გელა ხანიშვილი – საქართველოს გარემოს დაცვისა და სოფლის მეურნეობის მინისტრის პირველი მოადგილე, ლევან სილაგავა – ხორბლისა და ფქვილის მწარმოებელთა ასოციაციის აღმასრულებელი დირექტორი და შალვა ფიფია – USAID-ის სოფლის მეურნეობის პროგრამის CNFA ხელმძღვანელის მოადგილე.