დღეს ძალიან გავბრაზდი სამსახურში, რომ მივდიოდი, რადგან უამრავი ავტომანქანა დადიოდა. მე არ ვიცი, სად მიდიოდნენ, მაგრამ ერთი რაღაც მინდა ვუთხრა ყველას: თუ ამ ეტაპამდე მივაღწიეთ იმ შედეგს, რაც ყველა ქვეყანას, მათ შორის წამყვან ქვენებს შურთ, ლეტალობიდან და დაავადების გამოსავლიდან გამომდინარე, ეს ამ ეტაპზე საქართველოს მთავრობის, ჯანდაცვის სამინისტროსა და ნებისმიერი ექიმის დამსახურება იყო, მაგრამ დადგება მომენტი, თუ ადამიანები არ გავხდებით პასუხისმგებლიანი, ჩვენ ამ ომს ვერავითარ შემთხვევაში ვერ მოვიგებთ, - ამის შესახებ პირველი საუნივერსიტეტო კლინიკის დირექტორმა „დღის ქრონიკაში“ განაცხადა.
ლევან რატიანის თქმით, კორონავირუსი ახალია სამყაროსთვის და ერთადერთი, რაც მასზეა ცნობილი, ისაა, რომ თუ დავიცავთ ფიზიკურ დისტანციას და დავემორჩილებით ყველა წესს, ამ ომს აუცილებლად მოვიგებთ.
„აქედან გამომდინარე, თუ დავარღვევთ ამ ყველაფერს, ვივლით ქუჩაში, არ დავიცავთ ფიზიკურ დისტანციას და არ მივუთითებთ იმ ყველაფერს, რაც უნდა შევასრულოთ დაწვრილებით, ჩვენი ქვეყანა ამ ომს წააგებს და ეს ყველაფერი მხოლოდ და მხოლოდ იმ უპასუხისმგებლო ადამიანების დამსახურება იქნება, რომლებიც ჩვენი მოსახლეობის ძირითადი მკვლელები იქნებიან“, - განაცხადა ლევან რატიანმა.
საქართველოში კორონავირუსი 306 ადამიანს დაუდასტურდა, აქედან 69 უკვე გამოჯანმრთელდა.
imedinews.ge
ლევან რატიანი 
