COVID 19-ის გამო შექმნილი ახალი რეალობის გათვალისწინებით ორ წლიანი პაუზის შემდეგ ხელისუფლებამ მიიღო გადაწყვეტილება, რთველი კვლავ დაასუბსიდიროს. ამისთვის მთავრობამ 60 მლნ ლარი გამოყო. ამ ეტაპზე სუბსიდია მხოლოდ რქაწითელის ჯიშის ყურძენზე გავრცელდება. 

როგორც „ბიზნესი იმედზე“ ღვინის ეროვნული სააგენტოს თავმჯდომარე, ლევან მეხუზლა აცხადებს, გასული წლების პრაქტიკამ აჩვენა, რომ მოთხოვნა ამ ჯიშის ყურძენზე უფრო ნაკლებია.

„როდესაც დგება საშიშროება, რომ თავისუფალი ფასი თვითღირებულებაზე ნაკლები იყოს, მაშინ ხდება ხოლმე სუბსიდიით ინტერვენცია. ამის შემდეგ, არცერთი სახელმწიფო არ ტოვებს ერთი-ერთზე თავისუფალ ბაზარზე მოთამაშეებს. რამდენიმე წელია ქართული ღვინო ხუთეულში შედის საერთაშორისო, საექსპორტო ფასით. თუმცა, სამწუხაროდ ამასაც დაატყო პანდემიამ დაღი. არამარტო საქართველოს არამედ მთლიანად, გლობალური მოთამაშეების კუთხით გაიაფდა იტალიური, ესპანური და ა.შ ღვინოები“ , - განაცხადა ლევან მეხუზლამ.

აქვე გეტყვით, რომ 40 მლნ ლარი უშუალოდ კომპანიების თანადაფინანსებისკენ იქნება მიმართული, რათა მათ ფერმერებისგან ყურძენი გარკვეული პირობებით შეიძინონ. ჭარბი მოსავლის შემთხვევაში დარჩენილ ყურძენს კი სახელმწიფო ღვინის ქარხანა „აკურა“ შეისყიდის, რისთვისაც დამატებით 20 მლნ ლარი გამოიყო. წელს, სავარაუდოდ, 20,000-მდე მევენახე მიიღებს სუბსიდიას. როგორც სააგენტოს ხელმძღვანელი გადაცემაში აცხადებს, მათი მიზანია არც ერთი კილოგრამი ყურძენი არ დარჩეს ჩაუბარებელი და ფერმერებმა შემოსავალი არ დაკარგონ.

მისი თქმით, წელს ყურძნის საპროგნოზო მოსავალი ჭარბია და დაახლოებით 300 000 ტონას შეადგენს - რქაწითელი და კახური მწვანე 180 ათას ტონას, საფერავის მოსავალი კი 90 ათასი ტონის ფარგლებში იქნება.

Imedinews