თავიდანვე ოპოზიციაში არავის ჰქონდა იმის ილუზია, რომ ჩვენი მოთხოვნები 100%-ით დაკმაყოფილდებოდა. მოლაპარაკება გულისხმობს იმას, რომ ორივე მხარეს რაღაცის დათმობა მოუწევს. ამ პროცესმა გამოავლინა ერთი ტენდენცია, რომ ხელისუფლება მოდის ძალიან მნიშვნელოვან დათმობებზე და იხდის პოლიტიკურ ფასს იმ სამარცხვინო გაყალბებისთვის, რაც 31 ოქტომბერს მოხდა, - ამის შესახებ პარტია „მოქალაქეების“ ერთ-ერთმა ლიდერმა, ლევან იოსელიანმა „ტვ პირველის“ ეთერში განაცხადა.

„ალეკომ ძალიან კარგად ახსნა, თუ რას გულისხმობდა, და საკითხი დგას ძალიან მარტივად. როდესაც ოპოზიციური ძალები წავედით მოლაპარაკებებზე, ჩვენი მიზანი იყო რაღაც შედეგის გამოტანა. თავიდანვე ოპოზიციაში არავის ჰქონდა იმის ილუზია, რომ ჩვენი მოთხოვნები 100%-ით დაკმაყოფილდებოდა. მოლაპარაკება გულისხმობს იმას, რომ ორივე მხარეს რაღაცის დათმობა მოუწევს. ამ პროცესმა გამოავლინა ერთი ტენდენცია, რომ ხელისუფლება მოდის ძალიან მნიშვნელოვან დათმობებზე და იხდის პოლიტიკურ ფასს იმ სამარცხვინო გაყალბებისთვის, რაც 31 ოქტომბერს მოხდა. ამისთვის ხელისუფლება დებს პრაქტიკულად მთლიანად საარჩევნო რეფორმას. ამას ემატება ბარიერების ის სისტემა, რომელიც ორპოლუსიანობის დასრულებას გახდის შესაძლებელს“, - განაცხადა იოსელიანმა.

ალეკო ელისაშვილმა დღეს Facebook-ლაივის დროს განაცხადა, რომ „ევროპული საქართველო“ აშშ-ის ელჩის რეზიდენციაში მიმდინარე მოლაპარაკებების საბოტაჟით არის დაკავებული.

ელისაშვილის ამ განცხადებას „ევროპული საქართველოს“ ლიდერი, სერგი კაპანაძემაც გამოეხმაურა. მისი თქმით, დარჩა შთაბეჭდილება, რომ ელისაშვილს უნდა პარლამენტში შესვლა და ახლა ეძებს საბაბს და ცდილობს, კონფლიქტში შევიდეს ოპოზიციასთან რაღაც მოგონილი საბაბით.

imedinews.ge