ლეუტუვის ყოფილმა პრემიერმა ანდრიუს კუბილიუსმა საოკუპაციო ხაზთან შექმნილ ვითარებაზე „ქრონიკის“ შეკითხვას უპასუხა. მისი თქმით, ჟენევის მოლაპარაკებები და რუსეთზე ზეწოლა უნდა გაგრძელდეს.
„გვაქვს ინფორმაციო საოკუპაციო ხაზთან შექმნილ ვითარებაზე, მოვლენებს ყურადღებით ვაკვირდებით, მუდმივად ვიღებთ ინფორმაციას და ვიცით, რა მდგომარეობაშია მოსახლეობა. ადგილზეა ევროკავშირის მისია.
უნდა გაგრძელდეს ჟენევის მოლაპარაკებები და ზეწოლა რუსეთზე. ბოლო პერიოდში, მაგალითად უკრაინასთან დაკავშირებით, ვლადიმერ პუტინი ცდილობს აჩვენოს, რომ უკეთ იქცევა. ვნახოთ, ასე გაგრძელდება, თუ ეს მისი მორიგი თამაშია, ზეწოლა და სანქციები ჩვენს ხელთ არსებული ბერკეტია“, - განუცხადა ქრონიკას კუბილიუსმა.
სახელმწიფო უსაფრთხოების სამსახურის ინფორმაციით, მათ საქართველოს ცენტრალური ხელისუფლების მიერ კონტროლირებად ტერიტორიაზე, გორის მუნიციპალიტეტის სოფელ გუგუტიანთკარში, უკანონო ინსტალაციები აღმართეს.
მანამდე, 14 იანვარს სუსმა გაავრცელა ინფორმაცია, რომ საოკუპაციო ძალები ხაშურის მუნიციპალიტეტის სოფელ ჩორჩანას მიმდებარედ ე.წ. უკანონო ბორდერიზაციის პროცესს აგრძელებდა.
სუსის მიერ გავრცელებულ განცხადებაში აღნიშნული იყო, რომ ჩორჩანას და სოფელ წაღვლის მიმდებარედ ტყის მასივში საოკუპაციო ძალების პროვოკაციული ქმედებების საკითხი დასმული იყო როგორც ინციდენტების პრევენციისა და მათზე რეაგირების მექანიზმის ფორმატში გამართულ შეხვედრებზე, ასევე ჟენევის საერთაშორისო დისკუსიების რაუნდებზე.
imedinews
ლიეტუვა
