საკონდიტრო ნაწარმის საერთაშორისო მწარმოებლები, რომლებსაც აქვთ სიმძლავრეები რუსეთის ფედერაციაში, გეგმავენ ევროპის სურსათისა და სასმელების ასოციაციას მიმართონ და ტკბილეულის წარმოებისთვის საჭირო ემულგატორებისა და საღებავების ევროკავშირის სანქციების სიიდან ამოღებაში დახმარება სთხოვონ. 

ირკვევა, რომ რუსეთის წინააღმდეგ ევროკავშირის სანქციებმა შესაძლოა კიდევ უფრო გაართულოს საკონდიტრო ნაწარმის წარმოება. ამის შესახებ რუსული „კომერსანტი“ საკონდიტრო საწარმოთა ასოციაცია „ასკონდას“ მიერ საკუთარი წევრებისადმი მიწერილ წერილზე დაყრდნობით წერს.

რუსეთის ფედერაციაში იმპორტისთვის აკრძალული საქონლის ჩამონათვალში შედის ემულგატორები და საღებავები, რომლებსაც იყენებენ საკონდიტროები, რომელთა ჩანაცვლება შეუძლებელია გემოს დაკარგვის გარეშე. ამავდროულად, ნედლეულის ნაკლებობა  ასორტიმენტის შემცირებას გამოიწვევს.

წერილში ნათქვამია, რომ საკონდიტრო ნაწარმის მრავალეროვნული მწარმოებლები, რომლებსაც აქვთ ლოკალიზებული წარმოება რუსეთის ფედერაციაში, გეგმავენ მიმართონ ევროპის სურსათისა და სასმელების ასოციაციას, რათა ხელი შეუწყონ ემულგატორებისა და საღებავების ამორიცხვას ევროკავშირის სანქციების სიიდან.

ტკბილეულის წარმოებაში გამოყენებული ინგრედიენტები ევროკავშირის სანქციების „მეხუთე პაკეტში“ მოხვდა. ევროპელი ოფიციალური პირები მიიჩნევდნენ, რომ ეს ნედლეული შეიცავს ორმაგი გამოყენების პოტენციალს, აღნიშნავს „ასკონდა“.

ვიაჩესლავ ლაშმანკინმა, „ასკონდას“ აღმასრულებელმა დირექტორმა, განაცხადა, რომ მთავარი პრობლემა არის ემულგატორები, რომლებიც გამოიყენება შოკოლადის, ნამცხვრების, ჰალვას, რბილი კარამელისა და ვაფლის ფურცლების წარმოებაში.

ლაშმანკინმა დასძინა, რომ ყველა ნედლეული არ შეიძლება შეიცვალოს სამხრეთ-აღმოსავლეთ აზიიდან და ახლო აღმოსავლეთის მიწოდებით. მან აღნიშნა, რომ რუსეთში საღებავების დიდი პალიტრა იწარმოება, მაგრამ რიგი პოზიციებით არის სირთულეები იმპორტირებულის ჩანაცვლებაში.

კარინა ანენკოვა, Delcredere-ს ადვოკატთა ასოციაციის ადვოკატი, აღნიშნავს, რომ კომპანიებს შეუძლიათ მიმართონ ევროკავშირის მეწარმეობის, ვაჭრობისა და დასაქმების დეპარტამენტს აკრძალვისაგან ნაწილობრივ ან დროებით გათავისუფლების თაობაზე რამდენიმე მიზეზის გამო: საქონლის გამოყენება ჰუმანიტარული, სამედიცინო მიზნებისთვის და ა.შ.