დონბასში 7-წლიანი კონფლიქტის დროს ცეცხლისშეწყვეტის რეჟიმი თითქმის 30-ჯერ გამოცხადდა. ბოლო, რომელიც 2020 წლის 27 ივლისს ამოქმედდა, ყველაზე დიდხანს მოქმედებდა, თუმცა, 2021 წლის იანვრიდან მისი დარღვევების შემთხვევათა რაოდენობა საშიშად გაიზარდა.
ბოლო 3 თვის მანძილზე 19 უკრაინელი ჯარისკაცი დაიღუპა მაშინ, როდესაც მთელი 2020 წელს 49 გარდაიცვალა. ზუსტი ინფორმაცია რეგიონში შექმნილი ვითარების შესახებ არავის აქვს, ფრონტის ხაზის მონახულება მხოლოდ ეუთო-ს სადამკვირვებლო მისიის წევრებს შეუძლიათ, თუმცა, მათ საქმიანობასაც სერიოზული შეფერხებები ექმნება.
კიევი და მოსკოვი ერთმანეთს კონფლიქტის ესკალაციაში ადანაშაულებენ, უკრაინის პრეზიდენტი რუსულ მხარეს საზღვრისპირა რეგიონებში ძალების კონცენტრაციაში ადანაშაულებს, ხოლო კრემლის პრეს-სპიკერის თქმით, მოსკოვი თავის ტერიტორიაზე მოქმედებს და ჯარების ეს გადაადგილება არავის არავითარ საფრთხეს უქმნის.
აშშ-მ რუსული მხარის აგრესიული და პროვოკაციული ქმედებები დაგმო, ხოლო შტატების ევროპულმა სარდლობამ, ევროპაში თავისი ძალების მზადყოფნა მაქსიმუმამდე აწია. ესკალაცია დონბასში ვიდეოკონფერენციაზე ვლადიმერ პუტინმა, ემანუალ მაკრონმა და ანგელა მერკელმა განიხილეს.
უკრაინის საგარეო საქმეთა მინისტრმა დმიტრი კულებამ განაცხადა, რომ უკრაინასთან დაკავშირებით ყველა გადაწყვეტილება უნდა მიიღებოდეს, მხოლოდ კიევის მონაწილეობით.
თუმცა, საჯარისო კვლევების ცენტრის დირექტორის მიხაილ სამუსის თქმით, ურთიერთობები პუტინს და ზელენსკის შორის იმდენად დაძაბულია, რომ საფრანგეთის და გერმანიის ლიდერები მათთან გასაუბრება ცალ-ცალკე გადაწყვიტეს. შესაბამისად, პუტინთან ონლაინ-კონფერენციის შემდეგ, ამჯერად პარიზში უკრაინის პრეზიდენტის ჩასვლაც იგეგმება.
რუსული გამოცემა Коммерсантъ -ის ინფორმაციით, ამ დროისთვის ჩიხიდან გამოსვლის 3 ვარიანტი განიხილება. პირველ რიგში ეს მოლაპარაკებებში პროგრესის არარსებობას უკავშირდება.
„ეს ახალი პრაქტიკა არაა. ყოველთვის, როდესაც კიევს და მოსკოვს შორის კონსულტაციები რთულად მიმდინარეობს, რუსეთი კიევზე ზემოქმედების მოსახდენად კუნთების თამაშს იწყებს“, - განაცხადა პარიზის უნივერსიტეტის პროფესორმა იული შუკანმა.
დაძაბულობის ზრდა აღმოსავლეთ უკრაინაშია შესაძლოა პუტინს და ბაიდენს შორის ბოლო კვირების მანძილზე სიტყვიერი პაექრობით იყოს გამოწვეული. ასევე სავარაუდოდ, მოსკოვის გაღიზიანება პრორუსი უკრაინელი პოლიტიკოსის, პუტინის პირადი მეგობრის ვიქტორ მედვედჩუკის წინაამღდეგ ამერიკული სანქციების დაწესების ფაქტმაც გამოიწვია.
მშვიდობა დონბასში - უკრაინის პრეზიდენტის ვლადიმერ ზელენსკის პროგრამის ერთ-ერთი მთავარი პუნქტი იყო.
„წინასაარჩევნო კამპანიის დროს ზელენსკი ძალიან მიამიტი იყო და ის მიიჩნევდა, რომ მშვიდობის დამყარება მარტივი საქმეა. დღეს კი ის მიხვდა, რომ პუტინისგან ვერაფერს მიიღებს“, - განაცხადა საგარეო პოლიტიკის ცენტრის ექსპერტმა ალექსეი მელნიკმა.
ამიტომაც, პრეზიდენტის ტონი უფრო მილიტარისტული გახდა და ეს ქვეყნის საგარეო პოლიტიკასაც დაეტყო. ამ დღეებში უკრაინის პარლამენტმა მიიღო რეზოლუცია, რომელშიც რუსეთი მიმდინარე ესკალაციაში და დონბასზე უკანონო შეიარაღებული ფორმირებების დაფინანსებაში და მართვაში დაადანაშაულა.
ამ დროისთვის დამკვირვებელთა უმრავლესობა შორს მიმავალი ესკალაციის სცენარს ნაკლებად რეალისტურად მიიჩნევს, თუმცა, მოვლენათა ასეთ განვითარებას არ გამორიცხავს. თუმცა, იმაზე ყველა თანხმდება, რომ უახლოეს კვირებში ახალი შეტაკებები და მსხვერპლი აუცილებლად იქნება.
lemonde.fr
მოამზადა თენგიზ აბლოთიამ
უკრაინა
