ბილ და მელინდა გეითსების განქორწინებამ ქველმოქმედების სამყაროში მიწისძვრის მსგავსი ეფექტი გამოიწვია.
ეს იმის მიუხედავად, რომ მათი 27-წლიანი თანაცხოვრების პერიოდში შექმნილი საქველმოქმედო ფონდი საქმიანობას განაგრძობს და უკვე ყოფილი მეუღლეები მის ფარგლებში კვლავ ითანამშრომლებენ.
„ბილ და მელინდა გეითსების ფონდი“ რომლის მიზანიცაა მთელს მსოფლიოში სიღარიბესთან, დაავადებებთან და უთანასწორობასთან ბრძოლა, დედამიწაზე უმსხვილესი საქველმოქმედო ორგანიზაციაა. მისი აქტივები 50 მლრდ. დოლარს შეადგენს და ის ჯანდაცვის მსოფლიო ორგანიზაციის ბიუჯეტში შემოწირულობების კუთხით მეორეა.
ბილ გეითსი, როგორც მეცნიერების ენთუზიასტი, ჯერ კიდევ რამდენიმე წლის წინ კაცობრიობას პანდემიის მოახლოვებაზე აფრთხილებდა. ბილის და მელინდას ფონდს ღარიბ ქვეყნებში, განსაკუთრებით აფრიკაში, ვაქცინაციის დიდი გამოცდილება აქვს, ფონდმა დიდი თანხები ჩადო Covax-ში, რომელიც 92 ღარიბ ქვეყანაში ვაქცინის გავრცელებას უზრუნველყოფს.
თუმცა, საერთაშორისო ინტერესს ამ ფონდის მიმართ მნიშვნელოვნად ზრდის ის გარემოება, რომ მას არა „ბილ გეითსის“, არამედ „ბილ და მელინდა გეითსის ფონდი“ ჰქვია, ეს კი გარკვეულ ინტრიგას ქმნის. ვის დარჩება საბოლოო ჯამში მსოფლიოში უმსხვილესი საქველმოქმედო ორგანიზაცია და მისი მფლობელების გაყრა მის საქმიანობაზე როგორ აისახება?
ამასთან დაკავშირებით ოფიციალური ტექსტი მოკლე და ლაკონურია - ყოფილი წყვილი ფონდის შექმნას ცხოვრებაში მთავარ მიღწევად (3 შვილის გაზრდის გარდა) მიიჩნევს, და მის ფარგლებში ერთად მუშაობას განაგრძობს. ამ სიტყვებმა წესით ფონდის 1600 თანამშრომელი უნდა დაამშვიდოს.
ამ შემთხვევაში ბუნებრივია, იბადება პარალელი მეორე გახმაურებულ განშორებასთან - 2 წლის წინ სიეტლში გაყრის შესახებ მსოფლიოს უმდიდრესმა ადამიანმა, Amazon-ის დამაარსებელმა ჯეფ ბეზოსმა და მისმა მეუღლემ მაკენზი სკოტმა განაცხადეს.
განშორების შემდეგ ის უზარმაზარი ქონების მფლობელი გახდა და მისი დიდი ნაწილი მან საქველმოქმედო ორგანიზაციებს გადასცა. ამჟამად სკოტი მსოფლიოს უმდიდრეს ქალთა რეიტინგის პირველ ხუთეულში შედის, იმის მიუხედავად, რომ თავად არასდროს არავითარი ბიზნეს-საქმიანობით დაკავებული არ ყოფილა.
ეს ორი განქორწინება, დიდი სხვაობს მიუხედავად, მსხვილ და ყოვლისშემძლე ბიზნეს-კორპორაციებში ადამიანური ფაქტორის მნიშვნელობას აჩვენებს. იმასაც, რომ ყველაზე მშვენიერი და კეთილი იდეები ხშირად კონკრეტულ ადამიანების კეთილ ნებაზეა დამოკიდებული.
Lemonde.fr
თენგიზ აბლოთია
ბილ გეითსი
