რამდენიმე დღის წინ Amazon-ის დამაარსებელმა ჯეფ ბეზოსმა კოსმოსში მცირე ხნით იმოგზაურა, თუმცა მისი ამბიციები კოსმოსურ ტურიზმზე ბევრად უფრო მაღალია - სწრაფი ინტერნეტის გავრცელება თანამგზავრების მეშვეობით.
პირველი სუბორბიტალური ფრენისთვის ბეზოსმა ყველაფერი დაგეგმა და მოამზადა, თუმცა ერთი დეტალი ვერ გაითვალისწინა - კერძოდ ის, რომ რიჩარდ ბრენსონმა მას რამდენიმე დღით დაასწრო.
თუმცა, ამის მიუხედავად, დარწმუნებულია, რომ მილიარდერებს შორის კოსმოსურ რბოლაში ის საუკეთესოა.
20 ივლისს მასთან ერთად კოსმოსურ ხომალდში მისი ძმა მარკი, მსოფლიოში ყველაზე ასაკოვანი ასტრონავტი უოლი ფანკი და 18 წლის ჰოლანდიელი ოლივერ დეიმენი იმყოფებოდნენ. ამ უკანასკნელმა ადგილი აუქციონზე შეიძინა.
მოგზაურებმა გადაკვეთეს 100-კილომეტრიანი ზონა, საიდანაც დედამიწის სიმრგვალე და კოსმოსის სიბნელე ჩანს. აქ ჩვენი პლანეტის მიზიდულობის ძალა არ მოქმედებს და ეს ადგილი კოსმოსის სიმბოლურ საზღვრად ითვლება.
ტურისტებმა უწონობაში რამდენიმე წუთი გაატარეს, შემდეგ კი დედამიწაზე დაბრუნდნენ. შეიძლება ითქვას, რომ ამით კოსმოსური ტურიზმის კარი გაიღო.
ამ იდეის რეალიზებაზე 20 წელი წავიდა. რიჩარდ ბრენსონის კომპანია Virgin Galacticმ-მა ამ წელს ჩატარებული წარმატებული ცდების შემდეგ განაცხადა, რომ კომერციული ფრენები კოსმოსში 2022 წელს დაიწყება. ბილეთი 200 000 დოლარი ღირს და 600 უკვე გაიყიდა.
ბრენსონის მიზანია წელიწადში 400 რეისის შესრულება.
ჯეფ ბეზოსის Blue Origin უფრო ფრთხილია და კონკრეტულ განრიგს არ აცხადებს.
„ამ წელს ჩვენ კიდევ 2-ს, ხოლო 2022-ში კიდევ რამდენიმე რეისს შევასრულებთ", - განაცხადეს კომპანიაში.
ბაზრის კვლევის თანახმად, საშუალოდ წელიწადში კოსმოსურ ტურიზმს 50 000-მდე პოტენციური კლიენტი ჰყავს, ხოლო რამდენიმე წელიწადში შესაძლოა ბილეთების მნიშვნელოვანი გაიაფება - 20 000 დოლარამდე.
ამ დროისთვის კოსმოსური ტურიზმი მხოლოდ ზემდიდრებზეა გათვლილი და სწორედ მათი იმედი აქვს კომერციული კოსმოსის მესამე მოთამაშეს - ილონ მასკს. მისი გეგმები გაცილებით უფრო ამბიციურია - ის 100 კილომეტრის სიმაღლეზე სიმბოლურად აფრენას და შემდეგ სახლში დაბრუნებას არ აპირებს.
ილონ მასკი ორბიტაზე 200-და 1000 კილომეტრამდე სიმაღლეზე რამდენიმე დღის გატარებას გეგმავს. სავარაუდოდ, ეს უკვე ამა წლის სექტემბერში მოხდება.
რიჩარდ ბრენსონზე მეტად, ჯეფ ბეზოსის კონკურენტი სწორედ ილონ მასკია, რომელმაც კოსმოსის ათვისებაში მას მნიშვნელოვნად გაუსწრო. ორივე მილიარდერის გეგმები კოსმოსურ ტურიზმს მნიშვნელოვნად სცდება - ბეზოსის ოცნებაა კოსმოსური სადგურების აშენება, სადაც ცხოვრებას და მუშაობას მილიონობით ადამიანი შეძლებს, ხოლო მასკის მთავარი მიზანია მარსის დაპყრობა.
ორი მეწარმე ერთმანეთს სხვა დარგშიც ეჯიბრება - კერძოდ, სწრაფი ინტერნეტის გავრცელებაში - მასკმა უკვე შექმნა სისტემა Starlink, რომელშიც 1000-ზე მეტი თანამგზავრი შედის, ჯეფ ბეზოსი საკუთარ თანამგზავრულ სისტემა Kuiper-ზე აქტიურად მუშაობს.
ის, რომ ბეზოსისთვის დღეს ძირითადი ინტერესის ობიექტი სწორედ კოსმოსია, ჩანს თუნდაც იმ ფაქტიდან, რომ ის სრულად გავიდა Amazon-ის მართვიდან და მთლიანად კოსმოსურ პროექტებზე გადაერთო.
lemonde.fr