დედამიწა იწვის - პირდაპირი გაგებით. ავსტრალიაში, ამაზონიაში, კამბოჯაში ასობით ათასი ჰექტარი ტყეები გახვეულია ცეცხლში, რაც იწვევს ადამიანების დაღუპვას, ფლორის განადგურებას, და ფაუნის გადაშენებას.
ეს დრამატული მოვლენები - მხოლოდ უმნიშვნელო მინიშნებაა იმაზე, თუ რა ელის კაცობრიობას დამთბარ მსოფლიოში. 14 იანვარს გამოქვეყნებული ინგლისელი და ავსტრალიელი მეცნიერების კვლევის თანახმად, კლიმატი სწრაფად იცვლება თითქმის ყველგან, რაც ზრდის ხანძრების საფრთხეს.
და ეს მხოლოდ დასაწყისია - ამგვარი მოვლენები საგრძნობლად გახშირდება საუკუნის ბოლოსთვის.
ხანძრები ავსტრალიაში - ეს არის სიგნალი იმაზე, თუ როგორი პირობები ჩაითვლება ნორმად მომავალში, როდესაც საშუალო ტემპერატურა დედამიწაზე გაიზრდება 3 გრადუსით - ამბობს ბრიტანეთის მეტეოროლოგიური სამსახურის დირექტორი, და კვლევის ერთ-ერთი ავტორი რიჩარდ ბეთსი.
მეცნიერებმა შეისწავლეს 57 კვლევა ხანძრებზე კლიმატური ცვლილებების გავლების თაობაზე, და მივიდნენ დასკვნამდე, რომ გახშირდა და უფრო მძიმე გახდა პირობები, რომელთა დროსაც მასიური ხანძრების საფრთხე განსაკუთრებით იზრდება.
ეს არის რეალობა, რომელიც ატარებს გლობალურ ხასიათს, და ეხება თითქმის ყველა ქვეყანას თუ კონტინენტს - რამდენიმე იზოლირებული და ნაკლებად დასახლებული რეგიონის გარდა.
კვლევის თანახმად, 1979-2013 წლებში იმ პირობების ერთობლიობა, რომელიც ზრდის ხანძრების საფრთხეს, გახშირდა 20%-ით. რა თქმა უნდა, ეს არ ნიშნავს, რომ ავტომატურად ასევე გაიზარდა ხანძრების რაოდენობა.
„ხანძრის გაჩენას ბუნებრივი პირობების გარდა სჭირდება სხვადასხვა ფაქტორები - საწვავის მისაწვდომობა, მშრალი ფლორა. ხანძრების აქტიურობა ბუნებრივი დათბობის გარდა დამოკიდებულია ადამიანების ქცევაზე, და ასევე ისეთ არაპროგნოზირებად მოვლენებზე, როგორც მეხის დაცემა“ - ამბობს Météo France-ს მკვლევარი ემილი ჯოცდერი.
მისი თქმით, კლიმატის ცვლილება უკვე შესამჩნევია - იზრდება გლობალური ტემპერატურა, უფრო ხანგძლივი ხდება ძლიერი სიცხეების პერიოდები, რა დროსაც იზრდება ხანძრების რისკებიც.
დღეს ეს სიგნალი უკვე აშკარად ჩანს ამაზონიაში, ხმელთაშუა ზღვის რეგიონში, სკანდინავიაში, აშშ-ს დასავლეთში და კანადაში. შედარებით ნაკლებად იგრძნობა გლობალური დათბობა ციმბირში.
რაც შეეხება ავსტრალიას, აქ კლიმატური პირობები მკვეთრად იცვლება ბუნებრივადაც, რაც ართულებს სასათბურე გაზების ზემოქმედებაზე დაკვირვებას - ამბობს ავსტრალიელი კლიმატოლოგი რენო ბარბერო.
„თუმცა, სავარაუდოდ, ამ წლის ხანძრებში კლიმატის ცვლილების წვლილი საკმაოდ დიდია“ - მიიჩნევს ის.
მოდელირება ცხადყოფს, რომ ასწლეულის ბოლოს სიტუაცია მკვეთრად გაუარესდება - ჩრდილოეთ ნახევარსფეროში ხანძრების სეზონები გაიზრდება მინიმუმ 20 დღით, ხოლო დამანგრეველი მასობრივი ხანძრები, რომლებიც ხდება ევროპაში საშუალოდ 100 წელიწადში ერთხელ, მომავალში მოხდება 5-10 წლის სიხშირით.
უარესი ჯერ კიდევ წინაა, თუმცა, ნეგატიური პროცესების შენელება ჯერ კიდევ შესაძლებელია - 2018 წელს ჩატარებული კვლევის თანახმად, ევროპაში საშუალო ტემპერატურის ზრდა 1,5 გრადუსით, გაზრდის დამწვარი ტყეების ფართის ზრდას 40%-ით, მაშინ, როდესაც 3 გრადუსით - 100%-ით.
ამიტომაც ქვეყნებმა სასწრაფოდ უნდა დაიწყონ კლიმატური ცვლილებების საწინაამღდეგო პარიზის შეთანხმების შესრულება იმისთვის, რომ გლობალური ტემპერატურა არ გაიზარდოს 2 გრადუსზე მეტით.