ფასების კოლოსალური ზრდის პირობებში რუსეთის ხელისუფლებას უკვე დიდი ხნის დავიწყებული საზოგადოებრივი პროტესტების განახლების ეშინია, და მას ამის მიზეზი ნამდვილად აქვს.

„ამჟამად სამსახურს ვერ ვშოულობ. ძირითადად მშენებლობებზე ვმუშაობ, და ზამთარში როგორც წესი, ისედაც ჭირს, დღეს კი ყველაფერი გაცილებით უფრო რთულადაა. ფასები კი საშინლად იზრდება და იზრდება“ - ამბობს ვასილი, რომელიც 88 უკიდურესად ღარიბ ადამიანთან ერთად მოსკოვის ერთ-ერთ ეკლესიაში, სოციალური დახმარების ცენტრში დადის.

იქ ისინი ჩაის, ბუტერბროდებს, ტანსაცმელს, და საპონს უფასოდ იღებენ. ცენტრის თანამშრომლის ოლგა ალექსანდროვსკაიას თქმით, მათთან არა მხოლოდ უსახლკაროები, არამედ ჩვეულებრივი, მშრომელ ადამიანები მოდიან, რომლებიც სამსახურის გარეშე დარჩნენ.

„მათ შორის ძალიან ბევრი თვითდასაქმებული იყო, ან კონტრაქტის გარეშე მუშაობდა, და პანდემიის გამო უმუშევარი დარჩა. ზოგჯერ დამსაქმებლებმა მათ ხელფასებიც კი არ გადაუხადეს. თანაც ეს ადამიანები არსად არ ირიცხებიან და სახელმწიფოსგან ვერანაირ დახმარებას ვერ იღებენ“ - ამბობს ის.

მისი თქმით, რუსეთში დღეს ყველაფერი - პირველ რიგში კვების პროდუქტები, უკიდურესად გაძვირდა, თანაც შემოსავლების მკვეთრი ვარდნის ფონზე, და ეს მოქალაქეთა დიდი უმრავლესობა გადარჩენის პრობლემის წინაში დგას.

რუსეთის სტატისტიკურმა სამსახურმა გაითვალა, რომ 2020 წელს ქვეყნის მშპ „მხოლოდ“ 3,1% -ით შემცირდა, თუმცა, ეს მაინც რუსეთისთვის ყველაზე მძიმე რეცესიაა 2009 წლის შემდეგ, როდესაც ეროვნული სიმდიდრე 7,8%-ით დავარდა. დეპრესიული ფონი, რომელშიც ცხოვრება რუსების უმრავლესობას უწევს, მათ უკმაყოფილებას ზრდის.

ეს ყველგან იგრძნობა - მაღაზიებში, გაზეთებში, ინტერნეტში, სოციალურ ქსელებში.

როსსტატის ინფორმაციით, რუსეთში ყველაზე გავრცელებული და პოპულარული პროდუქტი - კარტოფილი - 2021 წლის 5 კვირაში 40%-ით, ხოლო ხილ-ბოსტნეული 0 20%-ით გაძვირდა.

„ევროპისგან განსხვავებით, რუსეთში სასურსათო კალათაში ძალიან მაღალია იმპორტული პროდუქტების და მასალების წილი. შესაბამისად, რუბლის კურსის მერყეობა შემოტანილი საქონლის ფასებს ავტომატურად ზრდის. 7 თვის მანძილზე რუბლი ევროსთან 30%-ით, დოლართან კი - 21% დასუსტდა. რა თქმა უნდა, ამან გავლენა სასურსათო პროდუქტებზეც მოახდინა“ - ამბობს კომპანიაТелеТрейд -ის ანალიტიკოსი მარკ გოიჰმანი.

„ჩემი შემოსავალი გასულ წელთან შედარებით თითქმის 3-ჯერ შემცირდა, და მას თითქმის მთლიანად კვებაზე ვხარჯავ“ - ყვება მოსკოვში საკანცელარიო საქონლის პატარა მაღაზიის მფლობელი.

„საბედნიეროდ, ფართის ქირის ფასი არ გაზრდილა. თუმცა, მთელი საქონელი, რომლის დიდი ნაწილიც იმპორტულია, გაძვირდა. იგივე შეიძლება ითქვას კომუნალურ ტარიფებზე და საწვავზე. ეს არა მხოლოდ იმპორტს, არამედ ადგილობრივ წარმოებასაც ეხება, რომელიც უცხოურ ტექნოლოგიებზე და მასალებზე კრიტიკულადაა დამოკიდებული“ - ამბობს რითეილის ბაზრის ექსპერტთა საბჭოს თავჯდომარე ალექსეი კარპოვი.

ფორმალურად, ხელფასები გაიზარდა, მაგრამ ფასების კატასტროფული ზრდის პირობებში რეალური შემოსავლები 2013 წელთან შედარებით 10,6%-ით ნაკლებია.

„ადამიანები უარესად ცხოვრობენ - რაც არ უნდა აუხსნა, პანდემია თუ არაპანდემია - ფაქტია, რომ ცხოვრება გაუარესდა“ - აღიარა რუსეთის პრეზიდენტმა ვლადიმერ პუტინმა, და განაცხადა რომ „გარკვეული ძალები“ ამ სირთულეების გამოყენებას ცდილობენ.

გამოიწვევს თუ არა მოსახლეობის სიდუხჭირის ზრდა სოციალური უკმაყოფილებას ან სულაც პოლიტიკურ პროტესტს? შესაძლოა, ოღონდ არა დღეს.

Левада-центр-ის გამოკითხვის შედეგების თანახმად, რუსების 43% მიიჩნევს, რომ საპროტესტო გამოსვლები შესაძლებელია, თუმცა, აქციებში მონაწილეობისთვის მზადყოფნას მხოლოდ 17% გამოხატავს.

ეს ცოტა არაა 145-მლნ.- ია ქვეყნისთვის, თუმცა, არასაკმარისი სერიოზული ცვლილებებისთვის.

Lefigaro.fr

მოამზადა თენგიზ აბლოთიამ