საფრანგეთი ქვეყნების კლასიფიცირებას სამი ფერის კატეგორიებად ახდენს - „მწვანე“, „ნარინჯისფერი“ და „წითელი“. კონკრეტულად რას მნიშნავს ეს საფრანგეთის მოქალაქეებისთვის, ვისაც უცხოეთში გამგზავრება სურის?

დელტა-ვირუსის მსოფლიოს სხვადასხვა წერტილებში გავრცელების გამო საფრანგეთის მთავრობას სხვადასხვა ქვეყნებში მოგზაურობის კუთხით რეკომენდაციების პერიოდული განახლება უწევს - ქვეყნები, რომლებიც გუშინ „მწვანეები“ იყვნენ, დღეს „წითლდებიან“ და პირიქით.

კლასიფიკაცია 9 ივნისიდან მოქმედებს და ის დამოკიდებულია ვირუსის გავრცელების მასშტაბებზე და მისი ვარიანტების რაოდენობაზე. ყველაზე უსაფრთხოა „მწვანე“ ზონა, ყველაზე საშიში - „წითელი“, ხოლო საშუალო, რომელშიც მსოფლიოს ქვეყნების უმეტესობა შედის - „ნარინჯისფერია“.

რას ცვლის ეს რეალურ ცხოვრებაში? იმას, რომ ყოველი ფერი მოგზაურობის პირობებს ცვლის, თანაც ეს მნიშვნელოვნად არის დამოკიდებული იმაზე, არის თუ არა ადამიანი აცრილი. თუ თქვენ ვაქცინაცია გაიარეთ - შეგიძლიათ ამ ჩამონათვალს ყურადღება არ მიაქციოთ და სადაც მოისურვებთ, იქ იმოგზაუროთ.

საფრანგეთში დაბრუნებისას არც ტესტირების ჩატარება მოგიწევთ და არც კარანტინში ჯდომა.

ვაქცინირებულებს ქვეყანაში გასამგზავრებლად არავითარი საპატიო მიზეზი არ სჭირდებათ - საკმარისია სურვილი გქონდეთ და თავისუფლად შეგიძლიათ იმოგზაუროთ თუნდაც ტურისტული მიზნებით. ქვეყნების ფერებად დაყოფა უპირატესად საფრანგეთის არავაქცინირებულ მოქალაქეებს ეხება.

თუმცა, გასათვალისწინებელია ისიც, რომ ფერების მიუხედავად, ეს სუვერენული სახელმწიფოებია, ხშირად საკმაოდ ძლიერი, მდიდარი და გავლენიანი, ამიტომაც მათ შესაძლოა უცხოელების შემოშვების თავიანთი წესები და პროცედურები ჰქონდეთ.

მაგალითად, იაპონია, რომელიც საფრანგეთის საგარეო საქმეთა სამინისტროს „მწვანე“ სიაშია, თავად ევროკავშირის მოქალაქეებს საერთოდ არ უშვებს. იგივე ავსტრალიასაც ეხება,

ფერების მინიჭების კრიტერიუმები შემდეგია: „მწვანე“ - ვირუსის გავრცელება სუსტია, საგანგაშო შტამები არ ვლინდება.

ამ დროსთვის „მწვანეებს“ შორის არიან: ევროკავშირის 27 ქვეყანა, ანდორა, ისლანდია, ლიხტენშტეინი, მონაკო, ნორვეგია, სან-მარინო, შვეიცარია, ავსტრალია, საუდის არაბეთი, არგენტინა, ბაჰრეინი და ა.შ.

ვის და რა პირობით შეუძლია ამ ქვეყნებში ჩასვლა? ნებისმიერს, ვაქცინირებულსაც და არავაქცინირებულს - იმ შემთხვევაში, თუ რა თქმა უნდა, თავად ამ ქვეყნებმა საზღვრები არ ჩაკეტეს.

ნარინჯისფერი ზონა - ვირუსის აქტიური, თუმცა კონტროლირებადი გავრცელება, საშიში შტამები არ ფიქსირდება. ამ ჩამონათვალში არიან ბრიტანეთი, ბალკანეთის ქვეყნები. იქ გამგზავრება მხოლოდ ვაქცინირებულებისთვისაა შესაძლებელი. აუცრელებისთვის ვიზიტს საპატიო მიზეზი უნდა ჰქონდეს - ან ოჯახური, ან პროფესიული ხასიათის. ტურიზმი საპატიო მიზეზთა ჩამონათვალში არ შედის.

წითელი ზონა - ვირუსის აქტიური, უკონტროლო გავრცელება, ფიქსირდება საშიში შტამები. ამ კატეგორიის ქვეყნებს შორისაა ავღანეთი, ბრაზილია, კოსტა-რიკა, კუბა, საქართველო, მოლდოვა, მონტენეგრო, პაკისტანი, რუსეთი, სერბეთი, სურინამი და თურქეთი.

მოგზაურობის პირობები იგივეა, რაც „ნარინჯისფერ“ ზონაში, თუმცა, საგარეო საქმეთა სამინისტრო თავის მოქალაქეების იქ ჩასვლას კატეგორიულად არ ურჩევს.