არჩევნებამდე რამდენიმე დღით ადრე ერთ-ერთმა უცხოელმა ჟურნალისტმა მინსკში სეირნობის დროს თქვა - „რა ლამაზი და სუფთა ქალაქია. რატომ აჯანყდა აქ ხალხი? დიდი სიამოვნებით ვიცხოვრებდი ბელორუსში“.
დღეს ასეთ სიტყვებს არც ერთი ადამიანი არ იტყვის, რომელიც ბელორუსში მიმდინარე მოვლენებს თვალს ადევნებს.
ცდება ის, ვინც ფიქრობს, რომ ბელორუსის პრეზიდენტის ალექსანდრ ლუკაშენკოს წინაამღდეგ მხოლოდ თავისუფლების მოყვარული ახალგაზრდა ადამიანები გამოვიდნენ - ქუჩაში მოსახლეობის ყველა კატეგორიაა გამოსული, მათ შორის ისინი, ვინც ლიბერალური ღირებულებებისადმი დიდი პატივისცემით არასდროს გამოირჩეოდნენ - პენსიონრები, მუშები, გლეხები, ტაქსისტები.
ამბოხებას ბევრი მიზეზი აქვს - მთავრობის ცინიკური და ანტიადამიანური პოზიცია კორონავირუსის ეპიდემიის დროს, ხელფასების მუდმივი ვარდნა და ეკონომიკური კრიზისის გამწვავება.
ეკონომიკურ ფაქტორებზე ყურადღებას ოპოზიციის ლიდერებიც ამახვილებენ.
ეკონომისტის ვლადიმერ კოვალჩუკის თქმით, ბელორუსები თავიანთი შემოსავლების თითქმის ნახევარს ბიუჯეტში იხდიან - მათ შორის ისინიც კი, ვინც ამა თუ იმ მიზეზით არ მუშაობენ. პარალელურად იზრდება კომუნალური ტარიფები, მაშინ, როდესაც ხელფასები მცირდება. ეს კი ბელორუსული რუბლის მუდმივი დევალვაციის ფონზე ხდება. სიტუაციას ასევე მინსკს და მოსკოვს შორის ურთიერთობების გაუარესება ართულებს.
„ბელორუსები მიხვდნენ, რომ ლუკაშენკოს პირობებში შექმნილი სიტუაცია უკვე არაა „ცუდი, მაგრამ სტაბილური, როგორც აქამდე იყო - ის უკვე მხოლოდ ცუდია და უახლოეს მომავალში უარესი იქნება“,- მიიჩნევს ის.
მინსკის სისუფთავეზე ყველა ლაპარაკობს, თუმცა, ეს გარეგნული სისუფთავე არაფერს არ ნიშნავს - ქვეყანა უკან მიდის. მიტინგებზე თითქმის ვერ ნახავთ ევროკავშირის დროშებს. ოპოზიციაც და მოქალაქეებიც მიიჩნევენ, რომ ევროინტეგრაცია სასწრაფო საქმე არაა. ყველა თვლის, რომ ბელორუსიას დამოუკიდებლად განვითარების შესაძლებლობა აქვს - საჭირო იქნება მხოლოდ მცირე დახმარება საწყისს ეტაპზე
ბელორუსებს არც რუსეთთან ღრმა ინტეგრაცია სურთ.
„ჩვენ გვსურს კარგი ურთიერთობები რუსეთთანაც და დასავლეთთანაც, მაგრამ ჩვენ საკუთარი სუვერენიტეტის შენარჩუნებაც გვინდა. 26 წლის მანძილზე ჩვენი ბელორუსული სულისკვეთება თითქმის განადგურდა. ჩვენ ყველაფრის გადაწყობა მოგვიწევს“ - მიიჩნევს ოპოზიციის აქტივისტი პაულინა.
ბელორუსი მიმომხილველის არტიომ შრაიბმანის თქმით, ამ დროისთვის რუსეთსა და დასავლეთს შორის დაპირისპირება მეორეხარისხოვანი საკითხია.
„თუმცა ძნელია წარმოიდგინო ანტირუსულად განწყობილი კანდიდატის გაჩენა მაშინ, როდესაც ბელორუსთა უმრავლესობა პრორუსულადაა განწყობილი“ - განაცხადა მან.
ბაჩო ადმია