ცხოველს, რომელიც ატარებს გადამდებ ინფექციას, და თვითონ არაა ავად, მეცნიერები უწოდებენ რეზერვუარს - კორონავირუსის შემთხვევაში ეს ეჭვგარეშე არის ღამურა - ბოლო კვლევამ დაადასტურა, რომ ამ ვირუსის გენომი 90%-ით ემთხვევა იმ ვირუსებს, რომლებიც ცირკულირებენ ამ ცხოველის ორგანიზმში.
თუმცა, პასტერის ინსტიტუტის დირექტორის არნო ფონტანეს თქმით, იყო კიდევ ერთი, „შუამავალი“ ცხოველი, რომელმაც გადაიტანა კორონავირუსი უშუალოდ ადამიანზე.
„ანალიზები გვიჩვენებენ, რომ უშუალოდ ღამურას ვირუსს არ შეუძლია ადამიანის რეცეპტორებზე მიმაგრება. შესაბამისად, მან გაირა სხვა სახეობის ცხოველის ორგანიზმი, სადაც მოახერხა ადამიანის ორგანიზმში შეღწევისთვის ადაპტირება“ - მიიჩნევს ფონტანე.
მისი თქმით, ჯერ უცნობია, რომელმა ცხოველმა ითამაშა შუამავლის როლი - იყო აზრი, რომ ეს შეიძლებოდა ყოფილიყო გველი, თუმცა ეს თეორია სწრაფად იქნა გადადებული განზე - კორონავირუსის ბუნებიდან გამომდინარე, „შუამავალი“ სავარაუდოდ იყო ძუძუმწოვარი, შესაძლოა მღრღნელი.
მკლევარები ვარაუდობენ, რომ ეს ცხოველი გაიყიდა ველური ცხოველების ბაზრობაზე უხანში, სწორედ იმ ქალაქში, სადაც დაიწყო ეპიდემია. ის ითვლება ზღვის პროდუქტების ბაზრად, თუმცა, რეალურად იქ იყიდებოდა ცხოველები, მათ შორის ველურიც.
არნო ფონტანეს აზრით, უნდა შემოწმდეს ცხოველების ყველა სახეობა, რომელიც იყიდებოდა უხანის ბაზარში, და გაირკვეს, ატარებს თუ არა რომელიმე მათგანი კორონავირუსს.
„ამას აქვს გადამწყვეტი მნიშვნელობა - ასეა შესაძლებელი მომავალში ვირუსის შესაძლო განმეორებით გავრცელების აღკვეთა. მაგრამ ვერავინ იტყვის რამდენი დრო იქნება საჭირო ამისთვის. ებოლას ვირუსის შემთხვევაში „რეზერვუარის“ ძიება დაიწყო 1976 წელს, პირველი შედეგები კი დაიდო 2005 წელს“ - ამბობს ვირუსოლოგი ერიკ ლერუა.
რაც შეეხება შიდსის ვირუსს, იმის დადგენას, რომ მისი წყარო იყო მაიმუნი, დასჭირდა 20 წელი.
„ყველა ამ ვირუსების და ინფექციების გავრცელებას საფუძვლად უდევს კონტაქტი ადამიანს და ველურ ცხოველებს შორის. ამიტომაც, ველური ცხოველები უნდა დარჩნენ იქ, სადაც არიან - ველურ ბუნებაში“ - თვლის არნო ფონტანე.
დროებითი ზომა ამ მხრივ უკვე მიღებულ იქნა - იანვრის ბოლოს ჩინეთმა აკრძალა ვაჭრობა ველური ცხოველებით ეპიდემიის დასრულებამდე, მაგრამ საფრანგეთის მეცნიერულ-კვლევითი ცენტრის ვირუსოლოგის ფრანსუა რენოს აზრით, ეს არაა საკმარისი.
„ჩვენ ყოველთვის ვცდილობთ ხანძრის ჩაქრობას, და როდესაც ის ჩაქრება, ველოდებით ახალს“ - თვლის იგი.
მისი აზრით, ველური ცხოველების ყიდვა-გაყიდვა მთლიანად უნდა აიკრძალოს - წინაამღდეგ შემთხვევაში დღევანდელ კორონავირუსს ხვალ აუცილებლად მოჰყვება რომელიმე სხვა, და ყველაფერი თავიდან დაიწყება.
Le Figaro
