კორონავირუსის პანდემიის პერიოდში, კარანტინის, დაკეტილი რესტორნების და სავაჭრო ობიექტების პირობებში, ადამიანები მთელს მსოფლიოში მიტანის სერვისით სულ უფრო მეტად სარგებლობენ.
კვების პროდუქტები, მზა კერძები, ტანსაცმელი, საყოფაცხოვრებლო ტექნიკა - დღეს ყველაფერი ეს ონლაინ-რეჟიმში იყიდება. ამ მოვლენის მასშტაბები წინა წლებთან შედარებით მკვეთრადაა გაზრდილი - მაგალითად, საფრანგეთში მოსახლეობის 87% საჭირო საქონელს ინტერნეტში ყიდულობს.
დღეისთვის ელექტრონული კომერციის მნიშვნელობა უკვე საყოველთაოდ აღიარებულია, თუმცა, ამ ბიზნესის გავლენას ატმოსფეროზე თითქმის არავინ ითვალისწინებს. ამ პრობლემაზე მომხმარებლები არ ფიქრობენ, მაგრამ ის ნამდვილად არსებობს.
ამერიკული კვლევითი ინსტიტუტის Harris Interactive Institute-ს გამოკითხვის შედეგების მიხედვით, ევროპაში მოსახლეობის 63% მიტანის სერვისს ეკოლოგიურად სავსებით უვნებლად მიიჩნევს. სინამდვილეში კი ასე არაა.
რა თქმა უნდა, ვაჭრობა ინტერნეტით ტრანსპორტით გადაადგილებას ამცირებს და ეს დადებითი ფაქტორია, თუმცა, საფრანგეთის ენერგეტიკის და გარემოს დაცვის სააგენტოსა ინფორმაციით, შეძენის და ნაყიდი საქონლის მიღების პროცედურის სიმარტივედ „ზემოხმარებას“ ახალისებს.
„სწრაფი მიტანის სერვისი, განსაკუთრებით მცირე პარტიებით, საწვავის მოხმარებას და სასათბურე გაზების გამოყოფას არათუ არ ამცირებს, არამედ ზრდის“, - ნათქვამია სააგენტოს ანგარიშში.
საშუალოდ, ერთი ონლაინ-შეკვეთის მიტანის პროცესში 12 გრამი CO2-ს გამოიყოფა, შესაბამისად, 10 შეკვეთის შესრულება ავტომობილის მიერ 1 კილომეტრის გავლას უდრის. ერთი შეხედვით, დიდი მაჩვენებელი არაა, თუმცა, შეკვეთების რაოდენობის ზრდის და იმის გათვალისწინებით, რომ ხშირად ერთი და იგივე მომხმარებელი მიტანის სერვისის მომსახურეობით დღეში რამდენიმეჯერ სარგებლობს, არც ისე მცირეა.
თანაც, ონლაინ-ვაჭრობას საზღვრები არ გააჩნია და სულ უფრო მეტი ადამიანი მთელს მსოფლიოში საქონელს საერთაშორისო ონლაინ-რითეილერებში ყიდულობს, ხოლო მათი შენაძენის მიწოდებას არა მხოლოდ მოტოციკლი, არამედ თვითმფრინავიც სჭირდება. ეს კი საწვავის ხარჯებს მკვეთრად ზრდის.
„ინტერნეტ-ვაჭრობა გლობალურ მასშტაბებში საქონლის ბრუნვას მკვეთრად ზრდის ტრადიციულ ვაჭრობასთან შედარებით. გამარტივებული ტრანზაქციები, უცხოეთში საქონლის შეკვეთის შესაძლებლობები, დიდი არჩევანი - ეს ყველაფერი იმას ნიშნავს, რომ ჩვენ გაცილებით მეტს ვყიდულობთ, ვიდრე რეალურად გვჭირდება’ - ამბობს სავაჭრო კომპანია NegaOctet -ის ექსპერტი ფრედერიკ ბორდაჟი.
ელექტრონული კომერციის ბუმის ნამდვილი სიმბოლოა Amazon - ფრანგი ონლაინ-მყიდველების 78%-მა განაცხადა, რომ ბოლო წლის მანძილზე მათ არასასურსათო საქონელი ძირითადად ამ პლატფორმაზე შეიძინეს. ონლაინ-რიტეილერს 2022 წლის ბოლოსთვის 85 თვითმფრინავი ეყოლება, ხოლო 2019 წელს მის მიერ ატმოსფეროში გამოყოფილი CO2-ს რაოდენობა 22%-ით გაიზარდა.
Amazon ცდილობს ეკოლოგიურად უფრო სუფთა გახდეს და ამიტომაც 2030 წლისთვის თავისი გადაზიდვების 50%-ს ეკოლოგიურად სუფთა ტრანსპორტზე გადაიტანს. ამისთვის კომპანიამ უკვე დღეს 100 000 ელექტრომობილი შეუკვეთა.
ParcelLab-ის მიერ საფრანგეთის 100 უმსხვილეს ინტერნეტ-მაღაზიებს შორის ჩატარებული კვლევის თანახმად, მათ შორის 24 კლიენტებს ეკოლოგიურად სუფთა მიწოდებას სთავაზობს.
თუმცა, ეს არაა საკმარისი იმისთვის, რომ ეს ბიზნესი ეკოლოგიურად უვნებლად ჩაითვალოს - ამისთვის ბევრი რამ უნდა შეიცვალოს. მაგალითად, შემცირდეს ექსპრეს-მიწოდება, მოხდეს შეკვეთების გაერთიანება, იმისთვის, რომ ერთმა სატრანსპორტო საშუალებამ რაც შეიძლება მეტი საქონელი მიიტანოს და შესაბამისად, ნაკლები საწვავი დახარჯოს.
მაგრამ Harris Interactive Institute-ის კვლევის თანახმად, ონლაინ-ვაჭრობის კლიენტებისთვის, ამ ბიზნესის მხრიდან ბუნების დაცვას ყველაზე ნაკლები მნიშვნელობა აქვს. მყიდველისთვის როგორც წესი პრიორიტეტი არა CO2-ს გამოყოფის შემცირება, არამედ მომსახურეობის სისწრაფე და დაბალი ფასია.
წყარო: www.lefigaro.fr
მიტანის სერვისი
