საბერძნეთში, კუნძულ ლესბოსზე ლტოლვილთა ბანაკში მომხდარმა მასშტაბურმა ხანძარმა გერმანიის ხელისუფლება და პირადად ანგელა მერკელი უხერხულ მდგომარეობაში ჩააყენა.
გერმანია, რომელმაც რამდენიმე წლის წინ ლტოლვილთა ყველაზე დიდი ნაკადი მიიღო, დღეს ისევ არჩევანის წინაშე დგას - რა მოუხერხოს იმათ, ვინც ამ ხანძრის შედეგად უსახლკაროდ დარჩა?
საზოგადოების აზრი ამ საკითხზე გაიყო.
ქალაქ როტენბერგის მერმა ფედერალური ხელისუფლებისგან დამწვარი ბანაკის ბინადართა მიღება მოითხოვა.
„ადრე საკუთარ თავზე აღებული ვალდებულებებისგან დამოუკიდებლად მოვიდა დრო, როდესაც გერმანიამ და ევროკავშირმა საკუთარ თავზე უნდა იტვირთონ პასუხისმგებლობა, საბერძნეთს მხარი დაუჭირონ და ლტოლვილები თავად მიიღონ“ - განაცხადა მან.
მისი თქმით, ქალაქი როტენბერგი, ქრისტიანული ჰუმანიზმის პრინციპებიდან გამომდინარე მეტი ლტოლვილის მისაღებად მზადაა. ის გერმანიის შინაგან საქმეთა მინისტრის ჰორსტ ზეეჰოფს ამ მიდგომის უგულვებელყოფაში ადანაშაულებს.
და ის მარტო არაა.
„დამწვარი ბანაკის სურათები საშინელებაა. ამ ადამიანებმა ყველაფერი დაკარგეს, და მათ სასწრაფო ჰუმანიტარული დახმარება სჭირდებათ“ - განაცხადა რეგიონ ჩრდილოეთ რეინი-ვესტფალიას პრემიერ-მინისრტმა არმინ ლაშეტმა.
ის ქრისტიან-დემორკატიული პარტიის ერთ-ერთი ლიდერი და ანგელა მერკელის ერთ-ერთი პოტენციური შემცვლელია, ამიტომაც მისი ხმა - მეტია ვიდრე ერთ-ერთი რეგიონის ხელმძღვანელის აზრი.
მისი თქმით, ის მზადაა კიდევ 1000 ლტოლვილი მიიღოს, და სხვა კოლეგებს გულისხმიერებისკენ მოუწოდებს,
მემარცხენე ლიბერალები გერმანიის მიგრაციულ პოლიტიკას მკვეთრად აკრიტიკებენ და მას გაუბედავად მიიჩნევენ, იმის მიუხედავად, რომ ბოლო 5 წლის მანძილზე ქვეყანამ მილიონზე მეტი ლტოლვილი მიიღო,
თუმცა, არსებობს საპირისპირო აზრიც, რომელიც არანაკლებ გავრცელებულია, და რომლის იგნორირებაც ანგელა მერკელს არ შეუძლია - ლტოლვილების დამატებითი რაოდენობის მიღებას საზოგადოების დიდი ნაწილი კატეგორიულად ეწინაამღდეგება.
ბოლო წლებში ძალებს იკრეფს მემარჯვენე „ალტერნატივა გერმანიისთვის“, რომელიც გამოხატავს მიგრანტების მიღების მოწინაამღდეგეებს აზრს. ისინი კი მიიჩნევენ, რომ გერმანიამ უკვე საკმარისზე მეტი ლტოლვილი მიიღო და მეტის მიღება, ხანძრის მიუხედავად დაუშვებელია.
ამ სიტუაციაში ანგელა მერკელის მთავრობა ევროპის სხვა ქვეყნებისგან სოლიდარობის გამოვლენას ითხოვს - კერძოდ, გერმანიის შინაგან საქმეთა მინისტრმა ჰორსტ ზეეჰოფმა განაცხადა, რომ ამ საკითხში ევროპა ერთიანი უნდა იყოს და გერმანია ამ პრობლემის წინაშე მარტო არ უნდა დარჩეს.
თუმცა, ევროპა პასიურობს - ევროკავშირის წევრი სულ უფრო მეტი ქვეყანა ლტოლვილების მიღებაზე ფაქტიურად უარს აცხადებს. როგორც ჩანს, დევნილების ახალი ნაკადის მიღება ევროპაში ბევრს არ სურს.
ისევ, როგორც რამდენიმე წლის წინ, ლტოლვილების პრობლემა ევროპის ერთიანობას ემუქრება.