იტალიურმა გაზეთმა La Repubblica-მ ჩვენი დროისთვის ძალიან აქტუალური ექსპერიმენტი ჩაატარა - შევიდა ინტერნეტის ბნელ ნაწილში, ე.წ. darknet-ში, სადაც მხოლოდ 2 საათში Pfizer-ის ვაქცინას მიაგნო.

პრეპარატის წარმოება სულ რამდენიმე დღის წინ დაიწყო, ოფიციალურად ჯერ არც ერთი ფლაკონის მოპარვის შესახებ არავის განუცხადებია, მაგრამ ვაქცინას კონტრაბანდისტები უკვე ჰყიდიან. ან საქმე გვაქვს თაღლითობასთან - ორივე შემთხვევა სამართალდამცავებისთვის ინტერესს უნდა წარმოადგენდეს.

დიალოგი გამოცემის ჟურნალისტს და კონტრაბანდისტს შორის ასე წარიმართა:

-„გამარჯობა! რა საქონელს ეძებთ აქ?

-კოვიდ-19-ს ვაქცინას. გაქვთ?

-დიახ. 2 დოზა, თითო 1000 დოლარად.

-როგორც უნდა დავრწმუნდე, რომ ყალბი არაა?

-კლიენტების მოთხოვნილებების დაკმაყოფილება - ჩვენი პრიორიტეტია. ამ შენაძენის შემდეგ, თქვენ ჩვენთან ისევ დაბრუნდებით, მეტ საქონელს იყიდით და სხვებსაც მოიყვანთ. ესაა ჩვენი გარანტია.

-როგორც იცით, ვაქცინა -80 გრადუსის პირობებში უნდა ინახებოდეს. ასეთი სიმძლავრის გადასატანი მაცივარი გაქვთ?

-ამაზე ჩვენი სპეციალისტები ზრუნავენ. ვაქცინას საუკეთესო მდგომარეობაში მიიღებთ, ეს საკითხი ნუ გაწუხებთ“.

Darknet -ი   ინტერნეტის ბნელი მხარეა, სადაც შეღწევა მხოლოდ სპეციალური პროგრამული უზრუნველყოფით შეიძლება, მაგალითად, ისეთით, როგორიცაა ბრაუზერი Tor. ჟურნალისტებს წვდომა ერთ-ერთ საიტთან ჰქონდათ, რომელზეც იარაღი, ნარკოტიკები, წამლები და საკრედიტო ბარათები იყიდება.

სისტემაში მათ გამყიდველი ფსევდონიმი chrisstore24 შეხვდა. ის ჟურნალისტებს არწმუნებდა, რომ რამდენიმე დღეში ვაქცინის 2 დოზას სახლში მიაწვდიდა, რომ მას შენახვისთვის აუცილებელი სამაცივრო მოწყობილობა აქვს და ვაქცინა - 80 გრადუსში ინახება.

საუბარი WhatsApp-ში გაგრძელდა, რომელსაც ამერიკული ნომერი ჰქონდა, თუმცა, ეს არ ნიშნავს, რომ chrisstore24 მაინც და მაინც ამერიკელია. ის შეიძლება იყოს ნებისმიერ ადგილას, თუნდაც თქვენს სამეზობლოში. Darknet-ი სწორედ ასე მუშაობს. იქ ყველა ანონიმურია, რადგანაც დიდი ნაწილია იმისა, რაც იქ ხდება, უკანონოა. ასევე უკანონოა ვაქცინის ყიდვაც, თანაც გაყიდვების დაწყებამდე.

ბაზარი Agartha მომხმარებლებს ძალიან ბევრ პროდუქტს სთავაზობს  - სტიმულატორებს, სინტეტიკურ პრეპარატებს, დოპინგს, და ა.შ. მხოლოდ ამ საიტზე ვაქცინის 80-ზე მეტი შემოთავაზება იყო. ყველა დაახლოებით ერთნაირად იყო წარმოდგენილი   - ერთი და იგივე გრამატიკული შეცდომებით, ფლაკონების ზოგადი სურათებით.

მხოლოდ გამყიდველის ნიკნეიმი  - (carlosjuan, lordpharma, rodrigomendez), ფასი (300-დან 1000 დოლარამდე) და  წარმოშობის სავარაუდო ქვეყანა იცვლებოდა.

ეს, რა თქმა უნდა, თაღლითობაა. ჯერ უცნობია ტრანსნაციონალური კომპანიების ლაბორატორიებში ქურდობის ფაქტები, თუმცა, სხვადასხვა ქვეყნებში პოლიცია და სპეცსამსახურები უკვე რამდენიმე გამოძიებას აწარმოებენ.

არც ერთი ვარიანტი - არც თაღლითობა, და არც ნამდვილი მოპარული ვაქცინების გაყიდვა - არარეალურად არ გამოიყურება სამყაროში, სადაც ჰოლივუდში გადაღებული ფილმები ინტერნეტში პრემიერამდე ჩნდება. ეს სერიოზული პრობლემაა, რომელიც ინტერპოლს და სპეცსამსახურებს ძალიან აწუხებთ.

„ეს ვაქცინა - 2021 წლის თხევადი ოქრო, და ჩვენ კიდევ საწყობების გაქურდვის და ტრანსპორტირების დროს თავდასხმების არაერთ ფაქტს დავინახავთ“ - განაცხადა ინტერპოლის გენერალურმა მდივანმა იურგენ შტოკმა.

პირველი ფაქტები უკვე დაფიქსირდა - ჩინეთიდან სამხრეთ აფრიკაში უკანონოდ 400 ფლაკონი ჩაიტანეს, და ეს - მხოლოდ დასაწყისია.

„თქვენი შეკვეთა მომზადების პროცესშია. აი ჩემი ბიტკოინ-საფულე, სადაც თქვენ თანხა უნდა ჩარიცხოთ. შემდეგ ამანათის თვალთვალისთვის ნომერს მოგცემთ“ - უხსნის იტალიელ ჟურნალისტებს  გარიგების დეტალებს chrisstore24.

თუმცა, ფლაკონის სურათის წარდგენაზე უარს ამბობს  - „თქვენ შეგიძლიათ სურათი ფორუმზე ნახოთ“ - პასუხობს ის.

lefigaro.fr

მოამზადა თენგიზ აბლოთიამ