9 თვის მანძილზე კოვიდ-19-სგან გარდაცვლილი ადამიანების რაოდენობამ მსოფლიოში უკვე მილიონს გადააჭარბა და ეს მხოლოდ ოფიციალური მონაცემებია. მეცნიერები მიიჩნევენ, რომ რეალური ციფრი გაცილებით უფრო მაღალია. თუმცა, ჯერ არაფერი დასრულებულა, პანდემია უკან არ იხევს და გარდაცვლილთა რაოდენობა ყოველდღიურად იზრდება. ერთ-ერთი კვლევითი ჯგუფის დასკვნის თანახმად, შესაძლოა წლის ბოლომდე ვირუსის მსხვერპლთა რაოდენობამ 3 მლნ.-ს გადააჭარბოს.
ჯონ ჰოპკინსის უნივერსიტეტის მკვლევარების დასკვნის მიხედვით, 1 მლნ.-ს დაღუპულთა რიცხვმა 28 სექტემბერს მიაღწია. თუმცა, სანტიაგოს უნივერსიტეტის პროფესორის ანდრეა აიორას აზრით, სავარაუდოდ ეს გაცილებით უფრო ადრე მოხდა.
„ხშირ შემთხვევაში კორონავირუსისგან სიკვდილიანობა არ ფიქსირდება ძირითადად ღარიბ ქვეყნებში, სადაც არასაკმარისი ტესტირებაა და თანაც ძალიან სუსტი მედიცინაა, ამიტომ ხშირად ადამიანები სახლში კვდებიან. კორონავირუსის სიკვდილიანობის მაჩვენებელი ტესტირების ზრდასთან ერთად მოიმატებს“ - მიიჩნევს ის.
სიეტლის უნივერსიტეტის პროფესორის ალიმოქ დადის თქმით, ამ მაჩვენებლის თავიდან არიდება სავსებით შესაძლებელი იყო.
„მაგალითად, შტატებში, სადაც კორონავირუსისგან გარდაცვლილთა რაოდენობა მსოფლიოში ყველაზე მაღალია (200 000-ზე მეტი), პირბადეების სავალდებულო ტარება სიკვდილიანობას მნიშვნელოვნად შეამცირებდა. სამომავლოდ ლეტალურობის დონე მთავრობის ქმედებებზეა დამოკიდებული“ - მიიჩნევს ის.
კვლევითმა ცენტრმა IHME-მ 19 ქვეყანაში შექმნილი ეპიდემიოლოგიური ვითარება გააანალიზა, და დაითვალა, რომ არსებული ტენდენციების შენარჩუნების შემთხვევაში წლის ბოლოსთვის დაღუპულთა რაოდენობა 2,5 მლნ.-მდე გაიზრდება.
თუმცა, მათემატიკური გათვლების თანახმად, იმ შემთხვევაში, თუ მოსახლეობის 95% პირბადეებს ატარებს, დღიური ლეტალურობა საშუალოდ 33 300-დან 17 450-მდე შემცირდება და პირიქით, თუ მთავრობების შეზღუდვებს მთლიანად გააუქმებენ, 2021 წლის დასაწყისისთვის მსხვერპლი 3,3 მლნ.-მდე, ხოლო დღიური სიკვდილიანობა 72 700-მდე გაიზრდება.
მოკდადის აზრით, პანდემიის შედეგად ასევე გვერდითი ფაქტორებით გამოწვეული სიკვდილიანობაც გაიზრდება, რომელიც ოფიციალურად კორონავირუსთან არავითარ კავშირში არ იქნება.
„მაგალითად, იმის გამო, რომ ადამიანების კლინიკებში სიარულს ერიდებიან და ამიტომ ვაქცინაციის დონე შემცირებულია, გახშირდება სიკვდილიანობა სხვა დაავადებებისგან. ამას დაემატება ალკოჰოლის და ნარკოტიკების მოხმარება და სიკვდილიანობა სხვა დაავადებებისგან იმ პირობებში, როდესაც საავადმყოფოები გადავსებულია კოვიდ-პაციენტებით“, - თვლის ის.
თუმცა, საწინაამღდეგო აზრიც არსებობს, სხვა მეცნიერები იმედოვნებენ, რომ შესაძლოა მილიონი ეპიდემიისთვის გარდამტეხი ციფრი გახდეს. შესაძლოა თავად ამ რიცხვმა ადამიანებზე ფსიქოლოგიური ზეგავლენა მოახდინოს და ისინი ბოლოს და ბოლოს გამოფხიზლდებიან. სწორედ გამოფხიზლება და კორონავირუსის სერიოზულობის სათანადო აღქმა შესაძლოა პანდემიის დასასრულის მიზეზი წამლის და ვაქცინის შექმნამდე გახდეს.
Le Figaro
თენგიზ აბლოთია