პანდემია ამერიკის კინოინდუსტრიას ანადგურებს - საყოველთაო მოლოდინი, გაურკვეველი დროით გადადებული გადაღებები, ჩაშლილი კონტრაქტები..

როგორ და როდის მოახერხებს„ოცნებათა ფაბრიკა“ ამ კოშმარიდან გამოსვლას? არავინ იცის, თუმცა, დღეს ბევრ კინოპროდიუსერს აქვს ბედნიერი დასასრულის და სწრაფად განვითარებადი სტრიმინგული ვიდეოს იმედი.

კორონაკრიზისის პირველი მსხვერპლი ჰოლივუდში გახდა აგენტი 007. „სიკვდილის დრო არაა“, 25-ე ფილმი ჯეიმს ბონდზე, თავის სახელს  ამართლებს - მისი გამოსვლა აპრილიდან ნოემბრამდე გადაიდო, თუმცა ეს - უკეთეს შემთხვევაში. არის უარესიც, რომლის წარმოდგენაც არავის არ სურს.

ჰოლივუდის სუპერ-გმირებს ამჟამად  უხილავი ორგანიზმი ემუქრება,  რომლის ზომაც არის სულ რაღაც 60 მიკრონი, და მათ უკვე სამყაროს გადარჩენა არ შეუძლიათ - არც ეკრანზე,და არც რეალურ ცხოვრებაში.

ცუდ დღეში არიან სერიალების მოყვარულებიც - სანახევროდ დასრულებული „სამშობლო“ სადღეისოდ ჩამოკიდებულია ჰაერში - არავინ იცის როდის გაგრძელდება ის, და გაგრძელდება თუ არა საერთოდ.

მაშინ როდესაც 3 მლრდ. ადამიანი მსოფლიოში კარანტინზე გადავიდა, ყველა ელოდა ახალ შემოთავაზებებს ჰოლივუდისგან,  თუმცა, კინოხელოვნების მექა ისევე, როგორც ყველაფერი დანარჩენი, დაიხურა  - როგორც ცნობილია, ჰოლივუდს მშვენიერად გამოსდის ფილმები გლობალურ კატასტროფებზე, და დღეს ის თავად არის ერთ-ერთი ყველაზე ცუდი სცენარის პერსონაჟი რეალურ ცხოვრებაში.

სკეპტიციზმი, შიში, გააზრება და კარანტინი - ჰოლივუდში კორონავირუსის ირგვლივ პროცესები ზუსტად ისევე განვითარდა, როგორც ყველგან  - ამბობს ტელეარხ Canal + -ის კორესპოდენტი ჰოლივუდში დიდიე ალუში.

„თუ ფილმის გადაღება ჯერ არ დაწყებულა და ის იმყოფება პროდიუსირების ან რედაქტირების სტადიაზე, სავარაუდოდ მას კიდევ დიდხანს ვერ გადაიღებენ. დრო გაჩერდა“ - ამბობს ის.

ჰოლივუდი - არაა მხოლოდ მდიდარი რეჟისორები, პროდიუსერები და კინოვარსკლავები, რომლებიც რამდენიმეთვიან კარანტინს თავიანთ ძვირადღირებულ ვილებში ბევერლი-ჰილზში ძალიან ადვილად გადაიტანენ.

ჰოლივუდში ასევე არის უამრავი რიგითი, შეუმჩნეველი თანამშრომელი, და მათ შესაძლოა ჰქონდეთ 2-3 თვისთვის საკმარისი დანაზოგები, და არავინ იცის რამდენი ხანი მოუწევთ უმუშევრად ყოფნა.

საუბარი არაა 10-15 ადამიანზე - ოცნებათა ფაბრიკაში 100 000-ზე მეტი თვითდასაქმებული მუშაობს, და ისინი  ხელფასებს საათების, დღეების, ან უკეთეს შემთხვევაში კვირების მიხედვით იღებენ. მათთვის გაურკვეველი ვადით გაგრძელებული კარანტინი და უმუშევრობა უდრის ნამდვილ კატასტროფას.

მათ შორის ბევრი იმდენად მცირე ხელფასს იღებს, რომ დაზღვევითაც  ვერ სარგებლობს.

დამსაქმებლების დანაკარგებიც საკმაოდ მასშტაბურია -  ყველა ფესტივალი და კინოპრემიერა გადაიდო, წარმოება გაჩერდა, გადაღებების ყველა განრიგი დაირღვა. კორონავირუსმა ჰოლივუდს უმძიმესი დარტყმა უკვე მიაყენა - მათ შორის ოსკარის ყოველწლიურ დაჯილდოებას.

„ახალი ფილმების გადაღება ძირითადად ივნისში იწყება, იმისთვის რომ შემოდგომაზე მოხდეს მათი წარდგენა ოსკარზე. დღეს ეს კალენდარი უკვე მოძველდა. შესაძლოა ოსკარის დაჯილდოება 2020 წელს საერთოდ არ ჩატარდეს - იმიტომ რომ არ იქნება საკმარისი რაოდენობის ახალი ფილმები. კინოაკადემია ამ საკითხზე უკვე მსჯელობს“ - განაცხადა დიდიე ალუშმა.

გრიგალის ცენტრში ყალიბდება „ახალი ჰოლივუდი“.  კინოთეატრების დროებითმა დახურვამ სხვა მოქმედ პირებს გზა გაუხსნა. ბოლო პერიოდში სტრიმინგული ვიდეო (მაგალითად Netflix)კინომოყვარულთა შორის სულ უფრო პოპულარული ხდება, და დღეს, საყოველთაო კარანტინის პირობებში, მოთხოვნა მასზე იზრდება.

თუმცა, კრიზისი მათაც შეეხო.

„სტრიმინგ-პლატფორმებს დიდი ინვესტიციები აქვს მხატვრულ და მენციერულ-პოპულარულ ლიტერატურაში, სერიალებში და ფილმებში, რომლებზეც მუშაობა შეჩერებულია კორონავირუსის გამო. 2020 წელს  600 ახალი სერიალი მზადდებოდა, და თუ მუშაობა 3 თვის მანძილზე არ განახლდა, ყველაზე პოპულარული სტრიმინგ-არხებიც კი დაკარგავენ მიმზიდველობას მაყურებლებისთვის“- თვლის სცენარისტი სკოტ კაუფერი.

ჰოლივუდში საკითხი „კორონავირუსამდე და კორონავირუსის შემდეგ“ განსაკუთრებით აქტუალურია სცენარების კუთხით - მიიჩნევს პროდიუსერი ჯეისონ ბლუმი.

„თხრობის მანერა, რომელიც იყო დამახასიათებელი ჰოლივუდისთვის, სამუდამოდ შეიცვლება. ყველაფერი, რაც იყო პანდემიამდე უიმედოდ მოძველდება“ - ამბობს ის.