როდის დაბრუნდებიან ტურისტები?- ბოლო პერიოდში ევროპაში ეს კითხვა პირველ ადგილზე  გამოვიდა. ქვეყნების ნორმალურ ცხოვრებას უბრუნდებიან, თანაც ზაფხულიც მოვიდა.მიზანი, გარკვეულწილად სოციალურიც არის, თუმცა პირველ რიგში მაინც ეკონომიკური. კორონაკრიზისამდე ტურიზმზე ევროკავშირის ეკონომიკის 10% მოდიოდა.იტალია, ესპანეთი და საბერძნეთი ტურისტულ სექტორზე ძალიან დამოკიდებულები არიან.  წლის ბოლოსთვის ამ დარგის დანაკარგები წინა წელთან შედარებით 40%-ს მიაღწევს, თუმცა, სხვადასხვა ქვეყნებში ვითარება განსხვავებულია.

 კულტურულ ტურიზმზე ორიენტირებული იტალიისთვის ყველაზე აქტიური სეზონი მარტიდან მაისამდეა, შემდეგ კი - სექტემბერ-ოქტომბერში. „პირველი ნაწილი მთლიანად ჩავარდა. შეძლებს თუ არა ქვეყანა სექტემბერ-ოქტომბერში დაკარგული პოზიციების აღდგენას, გაურკვეველია“ -აცხადებს ევროკავშირის კომისარი ეკონომიკის საკითხებში პაოლო ჯენტილიონი.

 „ეს ზაფხული ახალი კლიენტების მოპოვების სეზონი არ იქნება. დღეს ძირითადი მიზანია მუდმივი კლიენტების შენარჩუნება.“  - თვლის საფრანგეთის საგარეო საქმეთა მინისტრი ჟან-ბატისტ ლემუანი.საფრანგეთი ამ სიტუაციის გამოყენებას აპირებს. ეს აუცილებელია, რადგანაც ევროპაში კონკურენცია ტურისტულ დარგში მკვეთრად გაიზარდა.

 ხორვატია ტურისტულ სეზონს ხსნის. ამბობენ, რომ ქვეყანაში 20 000 ტურისტი უკვე ჩამოვიდა და ეს ქვეყანა მეტი დამსვენებლის მოზიდვასაც აპირებს . ლოზუნგი მარტივია - „დასვენება, რომელსაც თქვენ იმსახურებთ, უფრო ახლოსაა, ვიდრე წარმოგიდგენიათ“.მომავალი კვირიდან საზღვრებს იტალიაც ხსნის. ეს უსიამოვნო სიურპრიზი გახდა, რომელმაც გაღიზიანება გამოიწვია.

 „რამდენიმე დღის წინ ევროპის ტურიზმის მინისტრების სამიტი შედგა, სადაც იტალიელებს საზღვრების გახსნის თაობაზე არაფერი უთქვამთ“   - განაცხდა შეხვედრის ერთ-ერთმა მონაწილემ.

 კვიპროსი, რომლის მშპ-ს 15% ტურიზმზე მოდის, იმ მოგზაურებისთვის, ვინც დაადასტურებს რომ არაა დაინფიცირებული კორონავირუსით, საზღვრებს  9 ივნისიდან გახსნის. ქვეყანა ასევე ვიზიტის დროს დაინფიცირებული ტურისტების შენახვის და მკურნალობის ყველა ხარჯს თავის თავზე იღებს.  თუმცა, საზღვრების გახსნა საფრანგეთს და ბრიტანეთს ჯერჯერობით არ ეხება.

 თუმცა, შენგენის ზონის შიდა საზღვრების ხელმეორედ გახსნის და ჩამოსულებისთვის 14-დღიანი აუცილებელი კარანტინის გაუქმების გარეშე, ტურისტული სეზონის რეალური გახსნა შეუძლებელია.

ევროკომისია ცალკეულ ქვეყნებს შორის თავისუფალ მიმოსვლას  და ე.წ. „მინი-შენგენების“ შექმნას უარყოფითად აფასებს. ეს პირველ რიგში ბალტიის ქვეყნებს, ჩეხეთს, სლოვაკეთს და უნგრეთს ეხება. სწორედ ისინი ერთმანეთს შორის გადაადგილების განსაკუთრებული საშეღავათო რეჟიმის შექმნას გეგმავენ.

„სრულფასოვანი შენგენისკენ დაბრუნებას ვერანაირი რეგიონული შენგენი ვერ შეცვლის. ეს არის ჩვენი საერთო ბაზრის ფრაგმენტაცია და სხვა ქვეყნების დისკრიმინაციაა. ეს დაუშვებელია“ - მიიჩნევს ევროკავშირის კომისარი მიგრაციის საკითხებში მარგარიტას სკინასი.

 ზოგიერთი სხვა ქვეყანა, მაგალითად საფრანგეთი, გარე საზღვრის გახსნას, თუმცა მაღალი რისკის ქვეყნებისთვის აკრძალვის შენარჩუნებას აუცილებლად მიიჩნევს. სავარაუდოდ, ეს ბრაზილია და შტატებია, თუმცა, არა ჩინეთი, რომელიც ევროპის ტურისტული სექტორისთვის უმნიშვნელოვანესი მოთამაშეა.

 წყარო: lefigaro.fr

მოამზადა თენგიზ აბლოთიამ