ევროკომისიამ მიგრაციის საკითხზე რეფორმების პაკეტის პროექტი წარადგინა. ბრიუსელის მთავარი მიზანია - კავშირის ყველა ქვეყანაში ლტოლვილების თანაბარი და სამართლიანი განაწილდება.
სავარაუდოდ შეთანხმება საკმაოდ რთული იქნება - ბევრი ქვეყანა არასასურველი და პრობლემური ლტოლვილების მიღებაზე საერთოდ უარს აცხადებს.
კანონის თვალსაზრისით, ევროკავშირს ამ საკითხზე ერთიანი მიდგომა არ გააჩნია. საერთო ევროპულ ინსტიტუტებს რეკომენდაციებით გამოსვლა შეუძლიათ, თუმცა მთავარი საკითხი მიიღებს თუ არა ქვეყანა ლტოლვილებს, საბოლოო ჯამში მისი მთავრობის გადასაწყვეტია.
ბოლო წლებში ლტოლვილების დიდი ნაწილის მიღების ტვირთი საბერძნეთმა და იტალიამ იკისრეს. ისინი მიგრანტების სამართლიან განაწილებას ქვეყნებს შორის დიდხანს ელოდნენ თუმცა, „ევროპული სოლიდარობა“, რომელზეც ბრიუსელში ათწლეულების მანძილზე ლაპარაკობენ, მხოლოდ გერმანიამ გამოავლინა.
იდეალურ ვითარებაში ლტოლვილთა მიღება რამდენიმე ძირითად ფაქტორზე უნდა იყო დამოკიდებული - ისეთებზე, როგორიც არის მოსახლეობის რაოდენობა და მშპ. თანაც, ეს უნდა იყოს ვალდებულება და არა კეთილი ნება, წინაამღდეგ შემთხვევაში ყოველთვის იქნებიან ქვეყნები, რომლებიც ლტოლვილების მიღებაზე უარს იტყვიან.
მიგრაციის პრობლემისადმი ახალი მიდგომის აუცილებლობა 2015-2016 წლების კრიზისმა გამოიწვია როდესად ევროკავშირს, პირველ რიგში იტალიას, საბერძნეთს და ესპანეთს აფრიკიდან და ახლო აღმოსავლეთიდან ასობით ათასი ლტოლვილი მიაწყდა. 2015-2016 წლებში თავშესაფარი ევროპაში 2,4 მლნ. ხოლო 2017-2019 წლებში - 1,8 მლნ. ადამიანმა მოითხოვა. თუმცა, ბევრმა ქვეყანამ ლტოლვილების მიღებაზე კატეგორიული უარი განაცხადა.
პრობლემა რამდენიმე დღის წინ საბერძნეთში, კუნძულ ლესბოსზე მომხდარმა ხანძარმა გაამწვავა. სანამ პოლიცია ცეცხლის გაჩენის მიზეზებს იძიებს, 13 000 ადამიანი ღია ცის ქვეშ დარჩა. მათ შორის ნაწილმა თავშესაფარი უკვე მიიღო, მაგრამ მაინც ლტოლვილთა ბანაკში, არაადამიანურ პირობებში ცხოვრებას აგრძელებდა.
წარდგენილი დოკუმენტი ქვეყნების სოლიდარობას სავალდებულოს გახდის. ამის სანაცვლოდ, ბრიუსელი ყოველ მიღებულ ლტოლვილზე წელიწადში 10 000 ევროს გამოჰყოფს. მიგრანტების მიღებაზე უარის თქმის უფლება გათვალისწინებული არაა, სწორედ ეს პუნქტი იქნება სავარაუდოდ, ყველაზე პრობლემური.
ინიციატივები მიგრაციის საკითხში ევროკავშირის ქვეყნებს შორის უთანხმოებას ყოველთვის იწვევდა და გამოიწვევს დღესაც. რევოლუციური გარღვევა მოსალოდნელი არაა, ბრიუსელი ევროკავშირის ქვეყნებს შორის უთანხმოების შერბილებაზე უფრო ფიქრობს, ვიდრე პრობლემის სრულ გადაწყვეტაზე. ეს კი ნიშნავს, რომ ლტოლვილები ევროპის ერთ-ერთ მთავარ პრობლემად კიდევ დიდი ხნის მანძილზე დარჩებიან.
Le Figaro