ევროკავშირში პანდემია ძლიერდება, ხოლო 10 ქვეყანაში მდგომარეობა შემაშფოთებლად ითვლება.
ევროპის დაავადებათა კონტროლის ცენტრის ინფორმაციით, კორონავირუსის ახალი შემოტევისთვის დამახასიათებელია დაინფიცირების სწრაფი და მნიშვნელოვანი, ხოლო სიკვდილიანობის ნელი, მაგრამ თანმიმდევრული ზრდა.
სავარაუდოდ, უახლოეს კვირებში დაავადებათა და გარდაცვალებათა რაოდენობა მნიშვნელოვნად გაიზრდება.
ევროკავშირის 27 ქვეყანას შორის ყველაზე მძიმე მდგომარეობაა ბელგიაში, პოლონეთში, ნიდერლანდებში, ბულგარეთში, ხორვატიაში, ჩეხეთში, ესტონეთში, საბერძნეთში, უნგრეთში და სლოვენიაში.
„საყურადღებოდ“ მიიჩნევა ეპიდემიოლოგიური ვითარება გერმანიაში, ავსტრიაში, დანიაში, ფინეთში, ირლანდიაში, ლატვიაში, ლუქსემბურგში, რუმინეთში და სლოვაკეთში.
„მძიმე“ ქვეყნების უმრავლესობა აღმოსავლეთ ევროპულია, ხოლო „საყურადღებოთა“ შორის ბევრია ჩრდილოეთ ევროპის ქვეყნები.
რატომ? რით შეიძლება ამის ახსნა?
ვირუსოლოგის მილენ ოლიასტროს თქმით, ამის ერთ-ერთი მიზეზია ძალიან ცივი ამინდები ევროპის ამ ნაწილებში.
„ცივი ამინდი ნიშნავს, რომ ადამიანები უფრო მეტად იმყოფებიან დახურულ სივრცეში, და შესაბამისად, მათი დაინფიცირების ალბათობაც გაცილებით მაღალია. ვაქცინაცია, რა თქმა უნდა, გვიცავს და რომ არა ის, შედეგები ბევრად უფრო მძიმე იქნებოდა, თუმცა „დელტა-შტამის“ წინააღმდეგ აცრა ნაკლებად ეფექტურია“, - ამბობს ვირუსოლოგი.
მეორე ფაქტორია - ვაქცინაციის მასშტაბები, რომლებიც აღმოსავლეთ ევროპაში უფრო დაბალია, ვიდრე დასავლეთში. მაგალითად, გერმანიაში აღმოსავლეთ ნაწილში მოსახლეობა ნაკლებადაა აცრილი, ვიდრე დასავლეთში.
მაგრამ ეს არგუმენტი, რომელიც სავსებით რეალურია, როდესაც საუბარია აღმოსავლეთ ევროპაზე, ჩრდილოეთთან მიმართებაში არ მუშაობს - ბელგიაში, ნიდერლანდებში, ავსტრიაში, დანიაში, ლუქსემბურგში და ფინეთში, ვაქცინაციის მაჩვენებელი ძალიან მაღალია, თუმცა, დაინფიცირება იქაც იზრდება.
ინფექციონისტის პიერ პარნეს თქმით, არსებობს კიდევ ერთი ფაქტორი - ანტიკოვიდური ზომების სიმკაცრის დონე. მაგალითად, საფრანგეთში და იტალიაში შეზღუდვები გაცილებით უფრო მკაცრი იყო, ვიდრე აღმოსავლეთ და ჩრდილოეთ ევროპაში, თანაც მოსახლეობა რეგულაციებს მეტწილად იცავდა.
„დისტანცირების და ბარიერული ზომების დაცვა ძალიან მნიშვნელოვანი ფაქტორია და კვლევების თანახმად, მაგალითად, ხელების დაბანის რეკომენდაცია უფრო ნაკლებად სწორედ ჩრდილოეთ და აღმოსავლეთ ევროპის ქვეყნებში სრულდება. ასევე ძალიან მნიშვნელოვანია ჯანდაცვის სისტემის მდგომარეობა, თუმცა, არც ეს ფაქტორია ცალსახა და უპირობო - მძიმე და საყურადღებო ქვეყნებს შორის მედიცინის დონე მნიშვნელოვნად განსხვავებულია, თუმცა ისინი პანდემიის დარტყმის ქვეშ თითქმის ერთნაირად იმყოფებიან“, - განაცხადა პარნემ.
და კიდევ ერთი ფაქტორი, რომელიც შესაძლოა გადამწყვეტო იყოს - ტესტირების რაოდენობა.
იმ ქვეყნებში, სადაც დაავადებათა მაჩვენებლის ზრდა დაფიქსირდა, პარალელურად ტესტირებაც გაიზარდა, რაც შესაძლოა გაუარესებული სტატისტიკის მიზეზი გახდეს.
თუმცა, არც ეს ფაქტორია უპირობო - თუ დაინფიცირება მართლაც დამოკიდებულია ტესტირების მასშტაბებზე, სიკვდილიანობას ამასთან არანაირი კავშირი არა აქვს და ის მაინც იზრდება.
ასე რომ, ეპიდემიოლოგიური ვითარების გართულება აღმოსავლეთ და ჩრდილოეთ ევროპაში სხვადასხვა ფაქტორებთანაა დაკავშირებული.
თუმცა, ექსპერტები მიიჩნევენ, რომ პანდემიის მე-5 ტალღა არც დასავლეთ ევროპას ასცდება, მათ შორის, საფრანგეთს, სადაც ბოლო პერიოდში კოვიდ-რეგულაციებს სულ უფრო ნაკლებად იცავენ, ხოლო 80 წელზე უფროს მოქალაქეთა შორის 13% აუცრელია.