ლარმა სავარაუდოდ მიმდინარე პერიოდის მაქსიმუმს მიაღწია, — ამის შესახებ „თიბისი კაპიტალის“ კვირის მიმოხილვაშია აღნიშნული.
„წინა კვირაში ლარის გამყარება ასევე ჩვენი მოლოდინების შესაბამისი იყო. ამასთან, კვლავ ვინარჩუნებთ შეფასებას, რომ თუ საერთაშორისო ბაზრებზე დოლარი არ დასუსტდა, მართალია წმინდა სავალუტო შემოდინებები ძლიერი დარჩება, მაგრამ ლარის დამატებით მნიშვნელოვანი გამყარება უკვე ნაკლებ სავარაუდოა და ჭარბი შემოდინებებით უფრო ეროვნული ბანკის რეზერვების შევსება მოხდება. საამისო არგუმენტები ლარის სხვა ვალუტებთან მიმართებით საშუალო კურსი და ჩვენი შეფასებით, ინფლაციის შემცირების მოლოდინია. მართალია, წინა თვეებისგან განსხვავებით, მწარმოებელთა ფასების ინდექსის ივნისის დინამიკა საწინააღმდეგოზე მეტყველებს, თუმცა მხოლოდ ეს ერთი ინდიკატორი არაა საკმარისად დამაჯერებელი იმისათვის, რომ ინფლაციის ნორმალიზებასთან დაკავშირებით ჩვენი შეფასება მატერიალურად შეიცვალოს“, — აღნიშნავენ „თიბისი კაპიტალში“.
მიმოხილვის მიხედვით, ივნისის ექსპორტის მაჩვენებლები მართალია მხოლოდ მცირედით, თუმცა მოსალოდნელზე მაინც შედარებით სუსტ დინამიკას აჩვენებს.
"კვლავ მაღალია იმპორტში საინვესტიციო საქონლის წილი, განსაკუთრებით ნავთობის მაღალი ფასის ეფექტის გავლენის შესწორებით, რაც ეკონომიკის მაღალი ტემპით ზრდის მოლოდინებზე მიუთითებს. საკრედიტო აქტივობა ასევე ძლიერი მოლოდინების ინდიკატორია", — ნათქვამია მიმოხილვაში.