ფინანსთა მინისტრის ლაშა ხუციშვილის განცხადებით, ვაქცინაციის პარალელურად ქვეყანაში ეკონომიკისა და ტურიზმის ნაწილობრივი აღდგენის პერსპექტივა დიდია,  გარდა ამისა მიმდინარე თვეში ექსპორტის მიმართულებით მნიშვნელოვანი ზრდა უნდა დაფიქსირდეს, რაც ლარის მკვეთრ მერყეობებს გამორიცხავს. ამის შესახებ მან ფინანსთა სამინისტროში გამართულ პრესკონფერენციაზე ეროვნული ვალუტის გაუფასურების შესახებ დასმული კითხვის საპასუხოდ განაცხადა. 

„ლარის კურსთან მიმართებაში, პირველ რიგში ფუნდამენტურ და მაკროეკონომიკურ ფაქტორებიდან რამდენიმე კომპონენტს აღვნიშნავ: ეს არის გადმორიცხვები - რომელიც საკმაოდ გაზრდილია ბოლო პერიოდში და კლება არ გვაქვს; ექსპორტი, აღსანიშნავია, რომ გასულ თვეს ზრდა გვქონდა. ჩვენი ინფორმაციით, მიმდინარე თვეშიც მნიშვნელოვანი ზრდა უნდა დაფიქსირდეს ექსპორტის მიმართულებით. რაც ნიშნავს, რომ შემოდინებების ნაკადების აღდგენა ხდება; ტურიზმის მიმართულება, რომელიც დამოკიდებულია პანდემიის მართვასთან. ამ პროცესში მნიშვნელოვანია ვაქცინაცია. ცნობილია, რომ ვაქცინაციის პროცესი ევროკავშირის ქვეყნებშიც სირთულეებით დაიწყო. თუმცა ყველა ინფორმაციით რაც გამაჩნია, არის მოლოდინი, რომ ვაქცინაცია მნიშვნელოვნად დაჩქარდეს. ეს კი ერთ-ერთი განმაპირობებელია, რომ შევძლოთ ეკონომიკის სრული გახსნა, წელს ტურიზმის ნაწილობრივ და მომავალ წელს მნიშვნელოვანი აღდგენა. ყველა ეს ფაქტორი გვაძლევს მოლოდინს, რომ ლარის მკვეთრი მერყეობა მოკლევადიან პერიოდში არ უნდა გვქონდეს”, - განაცხადა ლაშა ხუციშვილი.

მან ეროვნული ბანკის მიერ ინტერვენციების პოლიტიკის შესახებაც ისაუბრა და თქვა, რომ სებ-ი ამას არა ლარის გაუფასურების გამო, არამედ საკუთარი სტრატეგიის მიხედვით ახორციელებს, რაც ინფლაციის თარგეტირებას უწყობს ხელს.

„როდესაც საუბარია ინტერვენციაზე, აქ მნიშვნელოვანია, რომ სებ-ს წინასწარ აქვს გაცხადებული სტრატეგია, რომელსაც მიჰყვება. შესაბამისად ეს არ ხდება იმისთვის, რომ კონკრეტულ პერიოდში ლარის კურსის კორექტირება განხორციელდეს. ეს არის იმის ნაწილი, რაც გულისხმობს ინფლაციის თარგეტირებას და ასევე მკვეთრი რყევებიდან თავის არიდებას“, - აღნიშნა ლაშა ხუციშვილმა.