„პანდემიიდან გამომდინარე, ზაფხულის პერიოდში სასტუმროს შემოსავალი კატასტროფულად 80-90% -ით, რესტორანის კი 55-60%-ით შეგვიმცირდა“, - ამის შესახებ „კომერსანტს“ შატო ყვარელის გენერალურმა მენეჯერმა პაატა ბერიაშვილმა განუცხადა.
მისი განცხადებით, ზაფხულის პერიოდში შატო ყვარელის ძირითადი მომხმარებლები უცხოელი ტურისტები არიან, რაც შეეხება ადგილობრივ ქართველებს მათგან დაინტერესება ნაკლებად იყო, რადგან ქართველი მომხმარებლების ძირითადი მოთხოვნა აუზია.
„გამომდინარე იქიდან, რომ ჩვენი სასტუმრო ქალაქში მდებარეობს და აუზი არ გვაქვს, ხოლო ზაფხულში ადგილობრივი ტურისტების მოთხოვნა ძირითადად აუზია, აქტივობა ძალიან დაბალი გვქონდა.
სასტურმო ძირითადად ევროპულ ტურისტებზე გვაქვს გათვლილი, რომლებსაც ღამის კომფორტულად გათენება და დღის ტურისტული ვიზიტებისთვის გამოყენება სურთ, გამომდინარე იქიდან, რომ უცხოელი ტურისტი არ იყო ქვეყანაში შემოსავალი კატასტროფულად შეგვიმცირდა“, - აღნიშნავს პაატა ბერიაშვილი.
პაატა ბერიაშვილის განცხადების რთველის სეზონზე ქართველი მომხმარებელის მხრიდან მოთხოვნა გაიზარდა, თუმცა ნომრებს უფრო შაბათ-კვირას ჯავშნიან.
„შემოდგომაზე, როდესაც სხვა სასტუმროებთან თანაბარ პირობებში აღმოვჩნდით, ანუ ღია აუზებზე მოთხოვნა არ არის, ჩვენთანაც მოდიან სტუმრები, შაბათ - კვირას საკმაო დატვირთვით ვმუშაობთ, რასაც კვირის დღეებზე ვერ ვიტყვი, თუმცა სექტემბერში უკეთესი მდგომარეობა გვქონდა“, - აღნიშნავს პაატა ბერიაშვილი.
ბერიაშვილის განცხადებით, შატო ყვარელში ტურისტებს ძირითადად კახური ღვინო და რთველი იზიდავთ, თუმცა რთველის პერიოდში დაინტერესება ქართველი მომხმარებლისგანაც არის და კორპორატიულ წვეულებებს და დაბადების დღეებს გეგმავენ. მისი თქმით, ლარის კურსის გაუფასურება მათ შემოსავალზეც აისახა, რადგან ყველანაირი პროდუქტი მათ შორის ჰიგიენური საშუალებებიც გაძვირდა, თუმცა სასტუმროს ფასის გაზრდას სამომავლოდ ვერ ახერხებენ, რადგან ქვეყანაში ტურისტი არ შემოდის.
თაკო კვაჭანტირაძე