COVID19-ის მიერ გამოწვეული ეკონომიკური შოკები მძიმედ აისახა საქართველოს ეკონომიკაზე, მათ შორის მნიშვნელოვან მაკროეკონომიკურ ინდიკატორზე გაცვლით კურსზე.  ლარის კურსი წლის დასაწყისიდან დოლართან მიმართებაში პოზიციებს ინარჩუნებდა, თუმცა, რაც პანდემია გაძლიერდა და  მსოფლიოს მრავალ ქვეყანაში გავრცელდა, ლარის კურსი მარტში 22%-ითაც კი გაუფასურდა. ნეგატიური მოლოდინების ჩასაქრობად და ლარის გასამყარებლად ეროვნულმა ბანკმა თავდაპირველად $100 მლნ-ის ინტერვენცია განახორციელა, რამაც სხვა ფაქტორებთან ერთად, ლარის კურსის გამყარება გამოიწვია. ბოლო ერთი თვის განმავლობაში, ლარის კურსი დოლართან მიმართებაში 3.30-იან ნიშნულს არ გადაცდენია.

ეკონომიკის ექსპერტი და ანალიტიკოსი ნიკა შენგელია მიიჩნევს, რომ ლარის კურსის მიმდინარე ტენდენცია მომავალშიც შენარჩუნდება და ის დოლართან მიმართებაში 3.10-დან 3.30-მდე ფარგლებში იმოძრავებს.

„ლარის კურსი დღეს ხელოვნური სუნთქვის აპარატზეა შეერთებული, ამაში ვგულისხმობთ იმას, რომ ეროვნული ბანკი ძალიან ხშირად ერევა სავალუტო ვაჭრობებში, ამიტომ ვფიქრობ, რომ რაც არ უნდა მოხდეს კურსი დოლართან მიმართბაში 3.30-იან ნიშნულს არ გადაცდება. ამ ყველაფერს მკაცრად აკონტროლებს ეროვნული ბანკი და ლარის კურსი იმოძრავებს 3.10-დან 3.30-ს ფარგლებში, ეს ტენდენდენცია მაისის ბოლომდე შენარჩუნდება. რაც შეეხება შემდგომ პერიოდს, როდესაც საერთაშორისო დახმარებების გაცემა დაიწყება, ვარაუდობენ მცირე გამყარებას, თუმცა არა მგონია რაიმე განსაკუთრებული ცვლილება მოხდეს, რადგან მოსახლეობამ მთავრობისგან მიღებული დახმარებები აუცილებელი პროდუქციის შესაძენად უნდა გამოიყენონ, ამიტომ ნაკლებ სავარაუდოა ხალხმა დოლარების შეძენა და სახლში შენახვა დაიწყოს. აქედან გამომდინარე, ლარის კურსის გაუფასურებას საფრთხე არ ემუქრება, ასევე არსებობს რეზერვები, რომლის ხარჯვაზე მსოფლიო სავალუტო ფონდისგან თანხმობაც აქვთ, ამიტომ მიმდინარე პერიოდში ლარის კურსი დოლართან მიმართებაში მაქსიმუმ 3.30-ს ფარგლებში იქნება“, - აღნიშნავს ნიკა შენგელია.

შეგახსენებთ, რომ ეროვნული ბანკის მიერ გამოქვეყნებული 1 მაისის ვაჭრობის შედეგად, ქართული ლარის კურსი თითქმის 1 თეთრით გამყარდა და ერთი აშშ დოლარის ღირებულებამ 3.1923 ლარი შეადგინა.

ნინო თამაზაშვილი