ბოლო 3 დღეში ლარი მცირედით, მაგრამ მაინც გაუფასურდა. თუ 29 ნოემბრის ოფიციალური კურსი აშშ დოლართან მიმართებაში 3.0967 იყო, 2 დეკემბერს 3.1279 გახდა, ორნიშნა ინფლაციის ფონზე ფასების მატების შიში კიდევ ერთხელ გაჩნდა, თუმცა, როგორც დისტრიბუტორთა ბიზნეს ასოციაციის პრეზიდენტმა ივა ჭყონიამ „კომერსანტთან“ საუბარში განმარტა, ლარის არსებული რყევები სხვა თანაბარ პირობებში ფასებზე გავლენას ვერ მოახდენს.
2013 წლიდან მოყოლებული, ყოველი წლის 31 დეკემბერს აშშ დოლარი უფრო ძვირი ღირდა, ვიდრე 1-ელ იანვარს, გამონაკლისი მხოლოდ 2017 წელი იყო. 2021 წელი შესაძლოა 2017-ს დაემსგავსოს, იანვარში კურსი 3.27-ს შეადგენდა, მარტსა და აპრილში 3.40-ს მიაღწია, თუმცა მაისში გამყარდა და ივნისიდან დასტაბილურდა.
კურსისგან განსხვავებით ინფლაციამ 10 წლიანი რეკორდი მოხსნა. ივლისიდან მოყოლებული ფასები ორნიშნა პროცენტული მაჩენებლით იზრდება. ოქტომბერში გასული წლის ანალოგიურ პერიოდთან შედარებით ვერმიშელი 11%-ით გაძვირდა, ლუდი ასევე 11%-ით, კარაქი 12%-ით, იუგურტი 13%-ით, ბანანი და ვაშლი 14-14 პროცენტით, შოკოლადი 15%-ით, ბრინჯი და ლობიო 16-16 პროცენტით, ხინკალი 18%-ით, შებოლილი თევზი 20%-ით, პური 22%-ით, ყურძენი 23%-ით, შაქარი 32%-ით, კვერცხი 39%-ით, მწვანილი 42%-ით, კარტოფილი 45%-ით, მზესუმზირის ზეთი 52%-ით, პომიდორი 117%-ით, ბადრიჯანი 128%-ით.
არასასურსათო პროდუქტებიდან გაზის გამათბობელი 12%-ით გაძვირდა, საპონი 13%-ით, ტელევიზორი 14%-ით, დიზელი 35%-ით და ბენზინი 43%-ით. მიმდინარე წლის ინფლაციაზე კურსზე მეტად გავლენა სწორედ საწვავის ფასების ზრდამ მოახდინა, რასაც ივა ჭყონიაც ადასტურებს. მისი თქმით, თუ დოლარის ღირებულებამ 3.20-ს არ გადააჭარბა, ფასები არ გადაიხედება, იგულისხმება შემთხვევა, თუ სხვა პირობები, ისეთები როგორებიცაა საწვავის ფასი ან თავად პროდუქციის თვითღირებულება უცვლელად შენარჩუნდა.
ოფიციალური 12.8%-იანი ინფლაცია ბოლო 10 წლის რეკორდია, თუმცა ეს მაჩვენებელიც საკამათო მეთოდოლოგიითაა გამოყვანილი. 2021 წლის იანვრიდან ელექტროენერგიის ტარიფი საყოფაცხოვრებო მომხმარებლებისთვის 1 კვტ/სთ-ზე 3.5 თეთრით გაიზარდა. მთავრობამ სხვაობის 1 წლით სუბსიდირება გადაწყვიტა, იმ აბონენტებისთვის, რომლებიც თვეში 300 კვტ/სთ-ზე ნაკლებს ხარჯავენ, რომელთა წილიც 95%-ს შეადგენს, საქასტატმა კი ჩათვალა, რომ გადასახადის გადამხდელების მიერ შევსებული ბიუჯეტიდან გამოყოფილი სუბსიდიის გამო ელექტროენერგიის ფასი უცვლელი დარჩა.
მაშინაც კი, თუ ინფლაციის გამოთვლის მეთოდი სწორია, ყველა იმ ადამიანის რეალური შემოსავალი, რომელთა ნომინალური ხელფასიც უცვლელი დარჩა ან მხოლოდ 10%-ით გაიზარდა, რეალურად — შემცირდა. გაღარიბდნენ პენსიონერებიც, რადგან შარშანდელი 220 ლარი წლევანდელ 248 ლარს უტოლდება, რაც 240 ლარზე მეტია, შარშანდელი 250 ლარი კი 282 ლარის ექვივალენტია, მაშინ როცა 70 წელს გადაცილებულთა პენსია მხოლოდ 275 ლარია.
გიორგი ელიზბარაშვილი