იანვარში ლარი დოლართან მიმართებაში უმნიშვნელოდ 0.8%-ით გაუფასურდა. სხვა ძირითად ვალუტებთან და სავაჭრო პარტნიორის ფულის ერთეულებთანაც გამყარების/გაუფასურების მაქსიმალური მაჩვენებელი 2.4%-ს არ გასცდენია. წლის პირველ თვეში ეროვნულმა ბანკმა კურსის შესანარჩუნებლად ორჯერადი ინტერვენციის შედეგად $80 მლნ გაყიდა, თუმცა ამ ინტერვენციებს რეზერვები არ შეუმცირებია, 31 იანვრის მდგომარეობით ის $4.1 მლრდ-ს შეადგენს და 1 წლის წინანდელ მაჩვენებელს 17.8%-ით აღემატება.
1-ელ იანვარს 1 აშშ დოლარის ოფიციალური ღირებულება 3.2766-ს შეადგენდა, 31 იანვარს 3.3026-ს. მაქსიმალური 3.3074-იანი მაჩვენებლი 6 იანვარს დაფიქსირდა. იმავე პერიოდში დაახლოებით იმავე მოცულობით, 0.9%-ით გაუფასურდა ლარი ფუნტთან, ევროსთან კი 0.5%-ით გამყარდა. 1 ევრო თვის ბოლოს 4 ლარი ღირდა, ხოლო 1 ფუნტი 4.52. შვეიცარულ ფრანკთან კურსი პრაქტიკულად არ შეცვლილა და მისი ღირებულება 31 იანვარს 3.72-ს შეადგენდა.
რაც შეეხება რეგიონულ ვალუტებს, ლარი #1 სავაჭრო პარტნიორ თურქეთის ეროვნულ ვალუტასთან 2.4%-ით გაუფასურდა. თუ თვის დასაწყისში 1 ლირა 43.99 თეთრი ღირდა, თვის ბოლოს 45.04 თეთრი გახდა. აღსანიშნავია, რომ ბოლო წლებში ლარზე მეტად ლირა უფასურდებოდა და შესაბამისად ლარი ლირასთან მიმართებაში მყარდებოდა. 2013 წელს, ჯერ კიდევ მაშინ, როცა დოლარი 1.66 ლარი ღირდა, ლირის შეძენა 93 თეთრად იყო შესაძლებელი. 8 წლის შემდეგ დოლარი 2-ჯერ გაძვირდა, ლირა კი ამდენივეჯერ გაიაფდა.
აზერბაიჯანულ მანათთან ლარი ერთ თვეში 0.8%-ით გაუფასურდა. სომხურ დრამთან 2-ჯერ უფრო მეტად - 1.6%-ით. 1 მანათი 31 იანვარს 1.9442 ღირდა, 1000 დრამი - 6.3726.
ერთადერთი მეზობელი, რომლის ვალუტასთანაც ლარი 1.2%-ით მგამყარდა, რუსული რუბლი იყო. თუ 1-ელ იანვარს 100 რუსული რუბლის შესაძენად 4.3912 ლარი იყო საჭირო, 31 იანვარს ოფიციალური კურსი 4.3383-ს შეადგენდა.
რაც შეეხება სხვა სავაჭრო პარტნიორებსა და მსოფლიო ვალუტებს იანვარში ლარი უკრაინულ გრივნასთან მიმართებაში 1.6%-ით, ხოლო ჩინურ იანთან მიმართებაში 2.4%-ით გაუფასურდა. იმავე პერიოდში ლარი იაპონურ იენთან 0.9%-ით გამყარდა.
გიორგი ელიზბარაშვილი