ლარის ფაქტორი განმსაზღვრელია ჩვენი ქვეყნისთვის, ლარი არის ვალუტა,რომელიც წლიდან წლამდე უფასურდება. მთავრობა კი გვიმტკიცებს,რომ ექსპერტები, ბიზნესის წარმომადგენლები ვქმნით ნეგატივს და ამ დროს ლარი ფრთხება. თურმე, ჩვენ ვაშინებთ და ვაუფასურებთ,- განაცხადა საქართველოს დისტრიბუტორთა ბიზნეს ასოციაციის ხელმძღვანელმა ივა ჭყონიამ კომერსანტის დილაში.
მისი თქმით, ეროვნული ბანკი არჩევნების წინა პერიოდში ჭარბი ფულის გამოსვლას მომზადებული უნდა დახვედროდა, ამან ზეწოლა მოახდინა ლარზე. მან ასევე ისაუბრა მთავრობაში შტატგარეშე მომუშავეთა რიცხვის ზრდაზე და განაცხადა,რომ საგრძნობლად არის გაზრდილი მივლინებებში დახარჯული თანხებიც.
მთავრობაში შტატგარეშე მომუშავეთა რიცხვმა 20%-ით გაიზარდა. 11 მილიონი შეადგინა ხელფასები, მაშინ როცა, ყველაფერი დაკეტილია და სახლიდან მუშაობს ყველა. შტატთან ერთად გაიზარდა მივლინებებიც - 16 მილიონი ლარია დახარჯული. ეს არის ფანტასტიკა. ქამრის შემოჭერის პოლიტიკა იცით,რა არის? - შტატგარეშე კი არა, ზედმეტი ვინც გყავს მათაც უშვებ (არ არის პოპულარული განცხადება, მაგრამ ბიზნეს სექტორმა თუ სანთლით საძებარი პროფესიონალი კადრები გაუშვა?!),- განაცხადა ივა ჭყონიამ. ის ინფრასტრუქტურული პროექტებისა და ინვესტიციების მნიშვნელობაზე საუბრობს.
კოვიდის პერიოდში გაცილებით უკეთ გამოიკვეთა ჩვენი სექტორის აუცილებლობა და ზოგადად, სექტორალური ასოციაციების მნიშვნელობა. ჩვენ ვიყავით მოწინავე ქვეყანა,სადაც პროდუქტის დეფიციტი არ ყოფილა.თითქმის 90%-ით დამოკიდებული ვართ იმპორტირებულ პროდუქციაზე და ადგილობრივი წარმოება - იმპორტირებულ ნედლეულზე. ჩვენ ამ პერიოდში ძალიან ბევრი ვიმუშავეთ ხელისუფლებასთან, გამოვყოფ ლევან დავითაშვილს,რომელიც ერთ-ერთი სამაგალითო ადამანია. მას ესმის ბიზნესის ენა და შესაბამისად, გაგვიმარტივდა მასთან კომუნიკაცია. ეს იყო ნამდვილად პოზიტიური მოვლენა, თუმცა, მის მიღმა ნამდვილად ბევრ პრობლემას წავაწყდით.
მთავრობამ უნდა მოუჭიროს ქამრებს და გაცილებით მეტი უნდა დახარჯოს ინფრასტრუქტურულ პროექტებში. ამ ტიპის პროექტებში დახარჯული თანხა და ინვესტიციები არის ჩვენი ქვეყნის მომავალი. ნებისმიერი პოლიტიკური პარტიისთვის რთული იქნება ჩვენი ქვეყნის ეკონომიკური მდგომარეობის გადაბარება, ძალიან მძიმე ვითარებაში ვართ,- აღნიშნა ივა ჭყონიამ.
ნათია კეკენაძე