საერთაშორისო კორპორაცია ICR-ის ავეჯის მაღაზიები „ლაბორატორია ჩემი სახლი“, „კარე“ და „მობლერი“ ივლისიდან ავეჯის ონლაინ გაყიდვებს იწყებს. როგორც „კომერსანტს“, კომპანიის მმართველმა მენეჯერმა გურამ მგელაძემ განუცხადა, ახალი პლატფორმა მომხმარებლებს საშუალებას მისცემს ავეჯი საქართველოს ნებისმიერი რეგიონიდან შეიძინონ.
„პანდემიის პერიოდში ონლაინ გაყიდვების კუთხით დიდი მოთხოვნაა და ყოველდღიურად იზრდება, როგორც ჩანს საქართველოს მოსახლეობა ამ სიტუაციას ეჩვევა. ივლისის თვიდან ახალ ვებ-გვერდს ჩავუშვებთ, სადაც ჩვენი სრული კატალოგი იქნება წარმოდგენილი და მომხმარებლებს პროდუქციის შეძენა ონლაინ შეეძლებათ. ეს იქნება ელექტრონული პლატფორმა, სადაც ჩვენი ბრენდები იქნება წარმოდგენილი, მათ შორის ეს არის „ლაბორატორია ჩემი სახლი“, „მობლერი“, „კარე“, იტალიური შოურუმები და ოფისის მიმართულების ბრენდი „ჩემი ოფისი“. პირველ ეტაპზე საიტზე 5 ბრენდის დაახლოებით 6000-დან 7000-მდე ნივთი იქნება განთავსებული და მომხმარებელს შეეძლება საქართველოს ნებისმიერი რეგიონიდან განახორციელოს შეძენა. ადამიანები Covid 19-ის პირობებში, მეტ-ნაკლებად ერიდებიან თავშეყრის ადგილებში მისვლას და ვფიქრობთ, ახალი ვებ-გვერდი გარკვეული სეგმენტისთვის უფრო კომფორტული იქნება“, - განაცხადა გურამ მგელაძემ.
საერთაშორისო კორპორაცია ICR-ს დიდი გამოცდილება აქვს ავეჯისა და დეკორის საცალო ბიზნესში. კომპანიამ პირველი ავეჯის მაღაზია „ჩემი სახლი“ 2002 წელს თბილისში გახსნა.
ნინო თამაზაშვილი